Contingency plan vs nCov gipagawas
CEBU, Philippines — Gipagawas na ni Gobernador Gwendolyn Garcia ang contingency plan sa giumol nga task force aron mapugngan ang 2019 novel coronavirus- acute respiratory dosease (NCoV-ARD).
Ang executive order no. 5 series of 2020 sa gobernador pahaom kini sa temporary travel ban nga gimando ni Presidente Duterte sa tanang pasaherong langyaw gikan sa China ug Special Administrative Region sama sa Macau ug Hong Kong.
Gawas lang sa mga Pilipino ug kadtong adunay permanent resident visa (PRV). Dili sab tugotan ang mga Pilipino nga makabiyahe padung sa China. Ang mga Pinoy ug PRV gikan sa China ug sa mga Special Administrative Regions niini, ipaubos sa 14 ka adlaw nga mandatory quarantine.
Ang mga taga Sugbo, sa balay lang i-quarantine samtang ang gikan sa ubang probinsya i-quarantine sa mga pasilidad nga giila sa Department of Health nga quarantine facility.
Tanang pas herong mosulod sa Sugbo papirmahon sa health declaration card nga ihatag sa Bureau of Quarantine. Apil sa tan-awon kun gikan ba sa China o sa mga rehiyon ang pasahero sulod sa nakalabay nga 14 ka adlaw.
Sa pikas bahin, si Dr. Rose Marie Terado ang city health officer sa Dakbayan sa Mandaue miingon nga magumol sab ang siyudad og task force para niini.
Ang task force mohimo og mga inspeksyon sa mga balay patigayon sa siyudad aron pahibaw-on sa mga angay buhaton. Wa pa hinuoy natala nga kaso sa maong dakbayan.
Samtang sa Dakbayan sa Talisay, gipahibalo ni Mayor Gerald Anthony “Samsam” Gullas Jr. nga nagkasabot sila sa kadagkuan sa City Health Office (CHO) pinangulohan ni Dr. Lino Alanzado ug mga kaubanan nga mamalit og face mask aron ipanghatag sa Rural Health Units (RHU) sa siyudad. Si Gullas miingon nga ihatag kini ngadto sa mga molupyo nga magpa check-up kay adunay gipamati nga ubo, sip-on, hilanat ug uban pa. Romeo Limpangog, Gabriel Bonjoc/IBM (BANATNEWS)
- Latest
