Bangi sa seniors sa Banilad ipaabot sa DILG

CEBU, Philippines — Ipadangat ngadto sa Department of Interior and Local Government ang kasungian sa niaging piniliay sa mga opisyal sa senior citizens sa Barangay Banilad, Dakbayan sa Mandaue.

Kini ang tambag sa pangulo sa Office of the Senior Citizen Affairs sa dakbayan, Raul “Pokang” Cabahug, ngadto sa grupo sa nidaug nga presidente sa grupo sa barangay nga si Manay Ben Yap.

Si Yap nga inahan ni Banilad Barangay Kapitan Greg Yap ug iyang mga kauban ang nidangop sa OSCA niadtong Biyernes tungod sa laing grupo nga gipangulohan ni Dante Bercede nga nangangkon sab nga maoy nidaug sa piniliay niadtong Enero 26.

Ang grupo ni Yap nagpahigayon sab sa maong adlaw og buwag nga piniliay.

Ang kampo ni Bercede giingong gisuportahan sa kasamtangang administrasyon ni Mayor Jonas Cortes.

Si Cabahug sa iyang pamahayag niingon nga ang piniliay sa grupo ni Yap maoy nakatuman sa gikasabutan nilang guidelines nga ang eleksiyon adto lang ipahigayon sa publikong lugar sama sa Barangay Banilad Gymnasium.

Hinoon si Bise Mayor Glenn Bercede nga igsoon ni Dante Bercede niingon nga makonsiderar nga publikong lugar ang basketball court sa Banilad.

Niangkon ang grupo ni Bercede nga kompleto sa mga sakop sa Board of Canvassers nga gilangkuban gikan sa OSCA ug ingon man sa representante sa buhatan sa mayor sa dakbayan.

Gitataw ni Cabahug nga sanglit siya ang pangulo sa OSCA sa dakbayan siya usab ang adunay katungod sa pagtudlo sa mahimong sakop sa Board of Canvassers nga nagrepresentar sa buhatan sa OSCA. /GMR (BANATNEWS)