Panic buying sa facemask
CEBU, Philippines — Bagang duot sa mga Sugbuanon ang naghugop sa usa ka tindahan sa medical supplies sa may Osmeña Boulevard aron makapalit og surgical facemask tungod kay ang maong tindahan gituohan nga pinakabarato ang presyo.
Pipila sa mga tawo nga nilinya sa maong lugar nitug-an sa Banat News nga kaadlawon pa sila nagatang sa pagpangabli aron makapalit ug facemask kay kadaghanan sa mga pharmacy miingon nga nahutdan na sila og stocks tungod sa kadaghan sa mga tawong nag panic buying.
Si Joann Vestil, usa sa mga nilinya nitug-an dul-an usa usab siya ka oras nga niapil sa pagbarug subay sa taas nga linya aron makapalit og usa ka box nga facemask nga mao ray ihatag ka mamalitay sa kantidad nga P190 nga adunay sulod 50 ka buok.
Dugang pa ni Vestil, nipalit siya daan mintras barato pa kay basin sa umaabot nga adlaw momahal unya ang facemask. Gitug-an ni Vestil, mas maayo mangandam na daan aron adunay magamit puhon.
Si Vestil, nitug-an basin magnihit na usab unya ang alcohol ug vitamins kay mao na usab sunod padulngan sa katawhan.
Samtang si Rex Rosacena nitug-an mas maayo mogamit nalang og facemask kay nagtuo siya sa “prevention is better than cure” nga panultihon. /IBM (BANATNEWS)
- Latest
