Pagpamangag sa MCWD sa Mandaue gipahunong

CEBU, Philippines – Gipahunong sa Siyudad sa Mandaue ang excavation permits sa Metropolitan Cebu Water District tungod sa kamatayon sa usa ka motorist nga nabuwasot sa usa sa ilang gibangag aron pagayo sa nabuslot nga tubo diha sa karsada sa Barangay Basak.

“Gipatawag na nako ang MCWD ug contractors ug gipa-hold nato tanan excavation permits sa MCWD until mahuman nila’g restore tanan nila gibangagan nga roads,” matud pang Atty. John Eddu Ibañez, chief of staff ni Mandaue City Mayor Jonas Cortes.

“Akoa pa gipa inventory all excavation nila kay atoa gipa restore nila tanan. ASAP. Kay di na sila ma isyuhan new permits until ma restore nila tanan,” dugang pa ni Ibañez.

Sa pikas bahin, si Mandaue City Police Chief Jonathan Abella misaad nga maghimo kini og imbestigasyon human niini masayri gikan sa mga tigbalita nga wala gyud gi-blotter sa mga polis ang maong aksidente.

“Ipa investigate ko na ngano wala na gi blotter nga even if walay niadto  ang tagtungod para magpa blotter, dapat adtoon gyud na sa police to know the details of the incident,” pasabot pa ni Abella.

Samtang sa gipagawas nga pamahayag sa MCWD, mipaabot kini sa pahasubo sa pamilya ni Richard Silao kinsa nakabsan sa kinabuhi kagahapong adlawa sud sa tambalanan pipila ka oras human mabalitok iyang motorsiklo sa lungag sa MCWD diha sa Basak.

“Rest assured, MCWD is closely coordinating with the Silao family,” pasabot pa sa MCWD.

Ang maong insidente naagian sa DyRF/ Banat News diin naghigda pa ang lalaki nga sa kadugayan giila nga si Silao nga nagkadugo.

Giingong nalagpot kini gikan sa gisakyan niining motorsiklo human nabuwasot sa giayo nga dalan sa maong dapit sumala pa sa mga nakasaksi.

Si Unah Marie Silao, nga nakahinabi sa Banat News mikompirmar nga nakutloan gayud sa iyang kinabuhi si Silao nga iyang igagaw. Matud pa nga nagtrabaho sa barko nga nag-angkorahe karon sa Ouano Wharf ang namatay. Rowena Capistrano/IBM (BANAT NEWS)