Naagian sa ursula apil sa suroy-suroy

CEBU, Philippines – Gibisita sa mga turista nga nanguyog sa Suroy-Suroy Sugbo ang mga lungsod nga gikuso-kuso sa bagyong Ursula sa amihanang bahin sa Lalawigan sa Sugbo.

Kini sama sa mga Lungsod sa Medellin, Daanbantayan ug Isla sa Bantayan nga gilangkuban sa Santa Fe, Bantayan ug Madridejos.

Dili mominus unom ka lungsod ang unang giagian sa dili mominus 200 ka partisipante kagahapon.

Kini mao ang Lungsod sa Consolacion, Compostela, Carmen, Sogod, Daanbantayan ug Medellin.

Nibiya ang grupo luwan sa unom ka bus gikan sa Kapitolyo pasado alas 7 sa buntag. Unang gihunongan ang Lungsod sa Consolacion diin didto namahaw ang mga partisipante sa Cansaga Bay.

Gisugat sila sa mga opisyal nga gipangulohan ni Mayor Joannes Alegado.

Gawas sa pamahaw, aktwal usab nga nakita sa mga partisipante ang paggama og sarok nga usa sa pasigarbo nga produkto sa Consolacion.

“We want them to see that we can still have nature even when we are in an urban area. As you can see the waters and beside us is our mangrove area,” matud ni Alegado sa ilang pagsuroy sa Cansaga Bay Park diin usab gihimo ang programa isip tour kick-off program.

Gitataw ni Alegado nga ang kagamhanan sa lungsod ang kasamtangan karon nga nagtinguha sa pag-ugmad sa Cansaga Bay isip mangrove area ngadto na sa paghimo niini nga nature park nga magsilbi usab kini sa ilang dapit nga eco-tourism.

Dugang pa niya nga sanglit nagkaduol ang ilang kasaulogan sa centennial founding anniversary karong Pebrero 6, 2020, ilang gitinguha nga mapakita ang pagpanggama og sarok ngadto sa ilang mga bisita.

“Consolacion is open for everyone whether they want to live here or they want to do business here,” gitataw ni Alegado. Sunod nga giadto ang simbahan sa Señor Santiago de Apostol sa Lungsod sa Compostela.

Sa Lungsod Carmen usab naniudto ang mga partisipante sa St. Benedixt›s Monastery diin gilingaw usab ang mga partisipante sa cultural performance sa mga tinun-an.

Sa Lungsod sa Sogod sa usa ka exclusive private resort gidala sa mga opisyal sa lungsod ang mga partisipante diin didto natilawan ang nagkadaiyabg pagkaon sama sa palabok, torta, puto, dinugoan ug tablea ug uban pa.

Apil sa gisuroy ang Lungsod sa Daanbantayan una pa ang katapusang destinasyon kagahapong adlawa nga mao ang Lungsod sa Medellin diin namahuway ang mga partispante ug karong adlawa motabok na sila sa Isla sa Bantayan. /GMR (BANAT NEWS)