Paghawan sa kadalanan hingusgan

CEBU, Philippines – Padayon ang Cebu City Transportation Office sa pagpanghipos sa mga makasabal sa kadalanan aron dali ra makalusot ang mga responders kung adunay emerhensya nga motumaw.

Kagahapon sa buntag walo ka e-bike, tulo ka trisikad ug usa ka motor ang gi-towing sa may Pasil tungod sa reklamo sa mga tawo kay magpatunga ug dili motahud sa mga traffic signs.

Pagka-hapon laing 10 ka e-bike, tulo ka trisikad ug usa ka motor ang gipangkarga may dalan Climaco ug Colon.

Giklaro sa CCTO nga wala sila mohatag og permit nga maka-operate ang mga e-bike sa kadalanan.

Giawhag ang mga sumasakay nga mopadulong sa Colon ilabi na kadtong mga nangiyawat sa plite nga dili nalang mosakay kay sa higayon nga makakita og patrol car sa CCTO mokaratil kini og dagan nga moresulta usahay sa disgrasya.

Sumala pa ni John Paul Amores, tigpabama sa communications and electronics sa CCTO, niawhag sa mga nadakpan sa pagbayad sa obligasyon aron dili idam-ok sa impounding area ang mga sakyanan diin magbayad pa sila og storage fee.

Sa Dakbayan sa Talisay, magsugod na og paghawan ang Barangay Lawaan 3 karong adlawa sa mga istraktura nga nilapas sa karsada o luna sa gobiyerno.

Si Jonathan Tumulak, traffic czar sa siyudad, nagkanayon nga hinay-hinay na nilang gipasabot ang mga tawo nga kamanduan kini sa Department of Interior and Local Government (DILG) ang ilang gibuhat.

Ang DILG nipadala na og kamanduan sa tanang barangay dili lang sa Talisay kun dili sa tanang barangay sa nasud.

Gani gisugdan man kini nila sa mga mayor ug gobernador diin pipila ka mayor ang napasakaan na og kaso gumikan sa pakyas nga pagtuman sa kamanduan.

Matud ni Tumulak nga mosunod na sab unya ang ubang mga barangay sa paghawan.

Siya nidugang nga anaa ang ilang sakop kung magkinahanglan og tabang ang mga opisyal. /GMR (BANAT NEWS)