Mandaue, Lapu-Lapu nipahinumdum sa permit renewal

CEBU, Philippines – Giawhag ang mga tagdumala ug tag-iya og mga establisemento sa Dakbayan sa Mandaue ug Dakbayan sa Lapu-Lapu sa pagduso na sa mga gikinahanglang dokumento alang sa renewal sa business permit kutob karong Enero 20.

Si Lapu-Lapu City Mayor Junard “Ahong” Chan niingon nga ang mga buhatan nga gitahasan sa pagproseso ilang mga dokumento ilang gipahimutang sa one-stop shop sa Hoops Dome nga bukas alas 8 sa buntag hangtud sa alas 5 sa hapon.

Naglakip sa mga buhatan sa maong lugar nga maoy kabahin sa paghikay sa mga dokumento alang sa renewal sa business permit mao ang Bureau of Fire Protection, City Health Office, City Engineering Office ug uban pa. Gipasabot ni Chan nga ang pagsaka sa pagbayad alang sa renewal sa ilang business permit tungod kini sa pagsaka sab sa ilang income sa tuig 2019 itandi sa tuig 2018 ug may gipatuman sab nga gamay nga usbaw ang bayranan sa BFP.

Si Atty. August Lizer Malate nga maoy Business Permit and Licensing Office (BPLO) chief sa Dakbayan sa Mandaue niingon nga ilang gipahimutang ang ilang one-stop shop sulod sa Mandaue City Cultural and Sports Complex.

Ang dakbayan adunay 17,000 nga gidaghanon sa mga establisemento nga nagkinahanglan og renewal sa ilang business permit alang sa tuig 2020.

Hugot nga gipahimangnoan ni Malate ang mga tag-iya ug nagdumala sa mga establisemento sa pagsumiter na sa ilang gikinahanglang mga rekisitos alang sa renewal sa ilang business permit aron kalikayan usab ang pagbayad og patong sa ilang bayranan. /GMR (BANAT NEWS)