Paspas nga renewal sa business permit
CEBU, Philippines — Nagtinguha ang Dakbayan sa Lapu-Lapu nga adunay kausaban sa mga transaksyon diha sa Lapu-Lapu City Hall ilabi na sa mga maghikay ug magproseso sa ilang business permits sugod karong tuiga.
Si Mayor Junard Ahong Chan miingon nga aron dili malangay ang mga magpapatigayon pag-renew sa ilang business permits karong tuiga adto nila kini himuon sa Hoops Doom sa barangay Gun-ob.
Magsugod ang renewal sa mga business permits karong adlawa hangtud sa Enero 20. Ug ang Hoops Dome maoy nakita ni Chan nga hamugaway nga venue para pagproseso sa maong dokumento inay nga sa City Treasurers Office.
“Change is really here kay sa unang higayon atong ipahigayon ang tinuig nga business renewal sa Hoops Dome kun diin mas daku og lugar, bugnaw ug kumportably ang atong mga business owners. Subay sa mandato sa atong talahuron nga Presidente Rodrigo Roa Duterte,” pasabot sa mayor sa maong dakbayan.
Gipasalig sa mayor nga sud lang sa usa ka adlaw mahuman dayon ang renewal sa business permit basta kompleto lang gyud sa mga rekisitos ang maglukat niini.
Sugdan ang business permit renewal sa alas 8 ang takna sa buntag hangtod kini sa alas 8 :30 ang takna sa gabii nga magsugod sa adlaw nga Lunes hangtod sa Biyernes.
Ang gikina-hanglan nga pagadad-on sa renewal sa business permit mao ang tulo ka kopya sa application forms, 2019 financial records, daan nga business permit, annual income tax return quarterly income tax return, quarterly VAT return ug monthly VAT returns. /IBM (BANATNEWS)
- Latest