Manitsit sa babaye dakpon

CEBU, Philippines — Dakpon na ang manitsit ug malisyusong manutok sa kababayen-an sa kadalanan ug mga publikong lugar sa Dakbayan sa Sugbo.

Kini human giaprobahan sa konseho sa siyudad ang ordinansa nga giduso nilang Konsehal David Tumulak ug Alvin Dizon nga gitawag og “The Safe Streets and Public Places Ordinance of Cebu City” subay usab sa Republic Act No. 11313 o ang Safe Spaces Act.

“We hope this measure will be strictly enforced once signed by the Mayor so we could help guarantee a safer public space for all which is a fundamental human right,” matud ni Dizon.

Matud sa balaud nga matawag nga “gender-based sexual harassment” diha sa kadalanan ug mga publikong lugar ang malisyusong pagpanutok, pagpanitsit o pagpanaghoy ngadto sa babaye, pagpamalikas, dili gusto nga mga pagdapit, pagpakita sa mga pribadong bahin sa lawas ug uban pa.

Ang maong mga matang sa “gender-based sexual harassment” mabuhat sab sa mga menor de edad sa kadalanan ug publiko nga lugar.

Dunay mga silot nga ipahamtang niadtong masakpan pinasikad sa balaud. /GMR (BANATNEWS)