Kapolisan niawhag ‘ATM’ di i-post
CEBU, Philippines — Giawhag sa Cebu City Police Office ang publiko nga kanunay nga magmabinantayon ug likayan nga mag-post sa social media nga mga “at this moment” aron dili mabiktima sa akyat-bahay atol sa holiday season.
Matud ni Police Lieutenant Colonel Clark Suarez Arriola, tigpamaba sa CCPO, nga sa panahon sa holiday naandan na sa mga tawo nga mag-out-of-town vacation uban sa pamilya.
Hinungdan nga giawhag ni Arriola ang publiko nga dili i-post kung asa o “ATM” tungod kay mao kini ang usa sa bantayan sa mga adunay dautan nga tumong sa pagpangawat o pagsaka sa panimalay tungod kay walay tawo. Dugang ni Arriola nga sa panahon sa Pasko ilabi na nga nagkaduol na usab ang Sinulog 2020, adunay mga dayo gikan sa laing lugar ang mangabot aron mangawat.
Hinoon sa pagkakaron wala pa silay na-monitor nga gikan sa laing lugar nga mga tulisan o mangawatay.
Subay niini, giawhag ni Arriola nga bantayan sa publiko ang tagsa-tagsa nga kaugalingon ug balay ug dili lang isalig ang seguridad ngadto sa kapolisan.
Buot ni Arriola nga adunay kalambigitan ang publiko sa ilang tagsa-tagsa nga seguridad. (BANAT NEWS)
- Latest
