60 porsiyento sa pamilyang Pilipino, kahoy ug uling pa gihapon ang gigamit

CEBU, Philippines — Usa sa mga gitumbok nga hinungdan sa mga dagkong sunog nga nahitabo dinhi sa Sugbo mao ang paggamit niining mga butane canisters nga gikargahan og liquefied petroleum gas alang sa ilang pagluto.

Matud pa sa chief executive officer sa Pascal Resources Energy, Inc. Nelson Par nga sa tibuok Pilipinas 60 porsiyento sa mga pamilya ang tiggamitan pa gihapon og sugnod nga kahoy ug uling nga makadaut sa panglawas tungod sa aso ug makaguba sab sa kalikopan.

Ang uban niini migamit sab og kerosene ug kining butane canisters nga gisudlan og LPGs nga gidili sa balaod tungod kay peligro ug maoy hinungdan sa pipila ka dagkong sunog nga nahitabo dinhi sa Metro Cebu.

Ang Pascal Resources Energy nagtinguhang makatabang sa maong mga pamilya paggamit og mas luwas ug de kalidad nga gamit sa pagluto pinaagi sa ilang Gaz Lite LPG nga canister nga mapalit sa baratong presyo ug pasado sa makuting testing sa Department of Science and Technology ug Department of Trade and Industry.

Lahi sa illegal nga butane canisters nga ginama sa nipis nga lata, ang Gaz Lite ginama sa aluminum ug walay sinumpayan (welding) mao nga luwas kining gamiton ug gipasalig ni Par nga duna kini tatak nga Philippine Standard ug pasado sa International Organization for Standardization (ISO) matud pang Par.

Ang Gaz Lite 230g nga canister mahimong gamiton sa kasamtangang “butane stove” sa mga panimalay tungod parehas ra kini og sukod, apan mas daghan og sulod ug luwas gamiton kun itandi sa illegal nga gisudlan og LPGs nga lata sa butane.

Nagtinguha ang kompanya nga sama sa naandang illegal nga butane canisters, mapalit sab sa mga gagmay nga sari-sari stores ang ilang Gaz Lite, apan ang kalainan mas dugay kining mahurot tungod kay puno kini sa kargang LPG ug maabtan og tulo ngadto sa lima ka adlaw.

Matud pa nga dili kaabot og 15 gramos ang sulod sa illegal butane canisters kay mismo ang illegal refillers nahadlok nga mobuto ang ilang nipis nga lata. Giawhag sab sa PRE ang mga illegal nga nag-refill og LPGs sa butane canisters nga mag-distributor nalang kanila aron legal ug luwas pa ilang negosyo. (BANAT NEWS)