Mga paryente sa kapitan apil sa person of interest

CEBU, Philippines —  Ang mga paryente sa kapitan sa Barangay Kalamtukan, Dakbayan sa Bayawan, Negros Oriental ang lakip sa gilantaw sa kapolisan isip person of interest sa kamatayon niini ug sa iyang 16-anyos nga pag-umangkon.

Kini maoy gibutyag sa direktor sa Police Regional Office (PRO)-7 Police Brigadier General Valeriano De Leon atol sa gipahigayong press conference kagahapon sa buntag.

Patay sa nahitabong pagpamanhig niadtong Sabado sa gabii si Kapitan Johnny Semillano Condez, 47, ug ang menor de edad niini nga pag-umangkon kinsa nagsakay og multicab niadtong higayona. “We have suspects based on the report, apparently this is a family feud exists in the longest time”,  matud ni De Leon.

Si De Leon nibutyag nga aduna silay nakuha nga mga saksi sa maong insidente ug gikuha na kini og affidavit sa kapolisan. Matud ni De Leon nga giingong ang biktima aduna kini personal nga bangi sa uban niyang paryente.

Ang kapolisan nagpahigayon og manhunt operation batok sa mga suspetsado. Sa pagkakaron ang kapolisan nagdumili pa kini sa pagbutyag sa mga pangalan sa mga suspetsado. Si De Leon nagkanayon nga ang mga kabhang sa bala na nakuha gikan sa lugar nga nahitaboan ilaha kining i-cross match sa mga loose firearms. Si De Leon niluwat kini og kamanduan nga palapdan pa ang checkpoints sa Negros Oriental ilabi na sa Dakbayan sa Bayawan.  BDB (BANATNEWS)