Mga seniors nakadawat na sa cash aid

CEBU, Philippines — Malipayon ang mga senior citizens sa Dakbayan sa Lapu-Lapu ug Dakbayan sa Mandaue sa pagkadawat na nila sa financial assistance kagahapon.

Sa Dakbayan sa Mandaue maoy gihimo ang pagbahig ngadto sa lima ka hugpong ang pagpanghatag nga gilangkuban sa lima ngadto sa unom ka barangay nga gipahigayon sa sulod sa ilang gym.

Mokabat sa P2,000 ang ilang nadawat sa mga senior citizens nga nagagikan sa 27 ka barangay sa maong dakbayan.

Ang maong kantidad maoy kabahin sa naunang gihatag sa kagamhanan sa Dakbayan sa Mandaue nga gihimo sa matag tulo ka buwan karong tuiga.

Ang unang pagpanghatag sa P2,000 nga cash assistance sa kagamhanan sa Dakbayan sa Mandaue ilang gihimo niadtong buwan sa Marso gisundad sa buwan sa Hunyo dayon sa Septiyembre u gang katapusan karong buwana diin nakompleto na ang P8,000 alang sa tuig 2019.

Samtang sa Dakbayan sa Lapu-Lapu, kapin sa 2,000 ka senior citizen nga nagagikan sa 30 ka barangay nga gilangkuban sa 11 ka barangay sa Isla sa Olango ug 19 ka barangay sa mainland sa maong dakbayan.

Ang unang P3,500 nga pinansiyal nga hinabang ang gihatag ni kanhi Mayor Paz Radaza niadtong Hunyo nga mao usab ang pagtapos sa iyang termino isip mayor sa dakbayan.

Gidugangan kini ni Mayor Junard “Ahong” Chan og laing P3,500 nga maoy nagsilbing pinaskohan ug sa kinatibuk-an P7,000 ang nadawat sa mga senior citizens karong tuiga. /GMR (BANATNEWS)