Suspek pagpatay sa pusher Sikop

CEBU, Philippines — Usa sa mga suspetsado sa pagpatay  sa giingong drug pusher nga gisuwayan paglubong duol sa gymnasium sa Barangay Lagtang sa Dakbayan sa Talisay niadtong Nobiyembre 25, nadakpan didto sa Lungsod sa Dumanjug.

Ang nadakpan sa kapolisan mao Christopher Amion, 20, nga taga Barangay Tabunok sa Dakbayan sa Talisay. Si Amion nadakpan sa mga sakop sa Dumanjug Police Station diha sa Barangay Paculob kagahapon sa hapon.

Si Amion usa sa gitumbok nga nipatay ug nisuway paglubong sa patay’ng lawas ni Juniel Cabiluna.

Matud pa ni Police Master Sergeant Ian Joseph Arapoc, Desk Officer, sa Dumanjug Police Station, nakadawat sila og tawag gikan sa usa ka concerned citizen nga dunay armadong tawo diha sa Barangay Paculob.

Dali kini nga girespondihan sa kapolisan pinangulohan sa ilang hepe nga Police Major Ardioleto Cabagnot.

Dugang pa ni Arapoc, atol sa pagresponde didto nasuta nga aduna kini giluklok nga armas sa iyang kilid hinungdan nga ilang gisita ug gipatahan. Nakuha gikan kaniya ang usa ka .38 revolver nga adunay tulo ka bala.

Gawas sa armas, nakuhaan sab kini og ginadili nga drugas nga dul-an sa P18 mil ang kantidad.

Sa pagsukit-sukit nila kang Amion, nitug-an kini nga siya taga Talisay City hinungdan nga gitawgan dayon nila ang maong dakbayan ug didto nasayran nga suspek kini sa pagpatay kang Cabiluna.

Sa pagkakaron ang dinakpan nagtingkagol na sa prisohan ug gipaabot nga pasakaan kaso tungod sa nakuhang armas ug drugas ug ipasa nila kini sa Talisay City Police aron atubangan sab ang kaso sa pagpatay kang Cabiluna.

Una nang nangadakpan sa buwag nga buybust operations ang mga kauban ni Amion nga sila si Jener Bacus, Xavier Jason Cabier, Areen Calinawan ug Rommel Bacacao.

Giingong nga gitulis sa grupo si Cabiluna kay gusto silang mosuyop og shabu nga libre apan nagmagahi ang biktima maong gipatay. /IBM (BANATNEWS)