Lima ka polis giimbestigar

CEBU, Philippines —  Lima ka mga polis ang gipaubos karon sa imbestigasyon tungod sa pagpangabuso, usa kanila namusil tungod kay wala kini atbangi sa tong-its atol sa haya sa minatay, samtang ang laing upat ka polis nag-viral sa social media tungod sa paggamit og sobrang pwersa sa pagsikop lang og usa ka hubog.

Ang nag-viral nga upat ka polis gialegar nga nangulata og mga sakop sa usa ka fraternity sa gawas nga bahin sa gihimong Rockfest ’19 concert diha sa Dakbayan sa Lapu-Lapu niadtong Sabado sa kaadlawon.

Nakita diha sa video nga gi-post online, ang mga kalalakin-ang giingong mga miyembro og fraternity nga gipangdakop ug gikulata sa mga polis.

Kagahapon sa buntag, mikatap sa online ang mensahe sa us aka concerned citizen nga nag-ingong ang maong mga sakop sa fraternity igo rang naghatud og pagkaon sa mga staff sa maong concert, apan karon mao na hinuoy gipasanginlang nagsugod sa kagubot.

“The people beaten by the police were only bringing food to eat for their staff, and was randomly accused of violence in the area,” ang mensahe miingon.  “Plus, the money in the bag with 50,000.00php which was meant to pay for the sound system and bands that played (were) only left with 12,000.00php,” dugang pa sa maong mensahe nga gitapos og panawagan sa mga netizens nga tabangan sila pag-share sa video kay ang nag-post sa maong video gihulga.

Usa ka babayeng giingong igsuon sa usa sa mga gikulatang sakop sa frat kinsa di gustong magpahingalan mitug-an sa The Freeman (igsuong pamantalaan sa Banat News) nga sa wala pa ang kagubot  dunay usa ka tiguwang nga gikulata kay nganong natulog kini sa multicab adtong mga nanumbag. Matud niya, ang iyang igsuon ug ubang mga ka brod niini naagian ang maong hitabo mao nga ilang gitabangan ang maong tiguwang nga lalaki. Apan dihang gitawag ang mga polis, gidiretso naman hinuon og dakop ang mga fratmen ug gipasanginlan silang nagsugod sa kagubot.

“Gitabangan tu siya’g (elderly man) tulo ka tawo , then naagian sa akong maguwang ug katung usa niya ka kauban, gitabangan nila katong tiguwang. Basin gatuo pud tung mga pulis nga silay nangulata,” matud pa niini.

“Gibira, gikulata then gipatid-patiran. Dayon akong maguwang gigukod pa jud nila. ilang gibukbok akong maguwang, ilang ginud-nod ang nawong, ingon pa nila na gihapak ug pistola ang iyang nawong mao ‘tung lagom kaayo nawong sa akong magulang,” dugang pa sa maong babaye kun giunsa pagbun-og iyang igsuon sa mga polis. Ang maong mga fratmen gidakop ug gipriso ug kagahapong adlawa lang nakagawas human nakapiyansa.

Si Police Colonel Carlito Baja, ang direktor sa Lapu-Lapu City Police Office miingon nga girelibohan na sa pwesto ang mga polis nga naa sa maong viral video aron ipaubos sa imbestigasyon.

“Actually gipa imbestigahan na nako sa akong investigator.. naa nakoy order niini na akong ipa relieve akong gibalhin diri sa admin holding,” matud pang Baja.

Samtang si Police Colonel Geovanie Maines, OIC sa Cebu City Police Office ug kasamtangang PRO-7 Deputy Regional Director for Operations mimando kang Baja pagsumitir og special report  bahin sa hitabo

Namusil

Didto sa Dalaguete, gireklamo si Police Staff Sergeant Mario Cartuciano, 38, sa iyang silingan kay giingong giingong gipusil kini sa maong polis kay nasuko nga di na sila makigsugal kaniya atol sa haya sa ilang silingan niadtong Domingo sa kaadlawon sa Barangay Langkas.

Si Cartuciano, lumad sa maong dapit apan nadestino kini sa Waterfront Police Station sa Cebu City. Ang reklamante mao si Bobeth Delposo, 30.

Matud pa ni Police Staff Sergeant Leon Gesim, Desk Officer sa Dalaguete Police Station, nidangop sa ilang buhatan si Delposo Domingo sa buntag ug misumbong nga gipusil siya ni Cartuciano apan swerteng wala siya maigo.

Sumala pa nga nasuko kaniya ang maong polis kay dili na sila makigduwa kaniya og baraha. Giingong miibot sa giluklok niyang pusil si Cartuciano ug gipusil si Delposo, apan ang nauwahi nakabantay ng daan ug una nang nakalayat ug nikaratil og dagan. Human sa hitabo, giingong dali nga nilakaw si Cartuciano. Nianang Domingo sa gabii, gihatud diha sa Dalaguete Police Station si Cartuciano sa iyang hepe nga si Police Major Joemar Pomarejos sa Waterfront Police Station aron patubagon sa reklamong gihapak kaniya.

Lakip sa gitahan ni Cartuciano ang service firearm niini ug ang iyang PNP ID.

Apan matud pang Gesim kusganong gihimakak ni Cartuciano ang pasangil batok kaniya.

Si Police Colonel Maines miingon nga relibohan sa pwesto si Cartuciano ug ibutang kini sa Regional Personnel Holding and Accounting Unit (RPAHU) alang sa himuong imbestigasyon.

Si Pomarejos mipasalig nga dili siya modapig sa iyang tawo kun makitang sad-an gyud kini. Sa paglingkod ni Pres. Duterte gipangusgan sa PNP pinaagi sa direktiba ang pagdili sa mga polis nga mosugal. The Freeman, IBM (BANATNEWS)