Lima ka bugaw gidakop

CEBU, Philippines — Lima ka gipasanginlang bugaw ang nangadakpan samtang walo ka mga babayeng giingong nagbaligya sa ilang dungog ang na-rescue sa kapolisan sa gihimo nga entrapment operation diha sa Sitio Sangi, Barangay Tabunok, Dakbayan sa Talisay kagahapon sa kaadlawon.

Ang mga dinakpan nailhan nga sila si Jessica Yudico Sodareo, 49, taga Sitio Sambagan, Brgy. Lagtang Talisay City; Diome Abatayo Mission, 50, taga Brgy. Lagtang Talisay City; Danilo Bangkaya, 60, taga Dawis Ramona, Talisay City; Raul Aprovechado Barcosa, 46, nagpuyo sa Pardo, Cebu City; Reno Flores Diacamos,34, taga Lipata, Minglanilla.

Si Police Major Gerard Ace Pelare, pangu sa Talisay City Police Station nibutyag nga nakadawat sila og report bahin sa operasyon sa prostitusyon diha sa maong lugar hinungdan nga ilaha kining gisubay.

Kauban ang taga Department of Social Welfare and Development nga si Lowella Bestil inubanan sa Women and Children Protection Desk nihimo sila sa maong operasyon.

Nagkanayon si Pelare nga sa dihang nahitabo na ang transaksyon o binayranay alang sa lawasnong kalipay dali dayong gisikop ang mga bugaw. Ang mga dinakpan gibalhug sa bilangguan samtang ang mga na-rescue nga kababayen-an ang gipaubos sa kustodiya sa CSWD.

Matud pa ni Pelare nga ang pagkasikop sa mga bugaw ug pag-rescue sa mga babayeng biktima sa eksploytasyon pinaagi sa prostitusyon makatabang aron dili na mokuyanap ang sakit nga Sexually Transmitted Diseases lakip na ang makamatay ug way kaayohang sakit nga HIV- AIDS sa maong lugar. (/IBM)(BANATNEWS)