37 ka kawani sa Cebu City gipaubos sa drug test
CEBU, Philippines — Nikabat sa 37 ka staff sa Cebu City Office on Substance Abuse Prevention (COSAP), Community Base Rehab Program (CBRP) facilitators, fire volunteers ug barangay councilor ang gipaubos sa kinalit nga drug test nga gipangulohan ni Jonah John Rodriguez, pangulo sa COSAP.
Matud ni Rodriguez nga niapil siya sa pagpahigayon sa drug test aron sa pagpakita sa tanan nga walay exempted sa balaod.
Ang gipaubos sa drug test naglangkob sa 17 ka sakop sa COSAP, unom sa CBRP, walo sa Pulangbato ug upat sa Basak San Nicolas fire volunteers ug duha usab ka konsehal sa Pulangbato.
Si Rodriguez nagpasalamat tungod kay walay nagpositibo sa mga gipaubos sa drug test.
Dugang ni Rodriguez nga mopahigayon pa unya sila og mga drug test diha sa nagkadaiyang buhatan hinungdan nga giawhag niya ang mga empleyado nga nalambigit sa ginadili nga drugas nga moundang na sila tungod kay nakahatag kini og kadaot kanila. (/BDB)(BANATNEWS)
- Latest