Polis nga “hitman” gi-AWOL na
CEBU, Philippines — Gideklarar na nga absent without leave (AWOL) ang polis nga gipasanginlang gunman sa pagambush patay sa usa ka brodkaster sa Dakbayan sa Dumaguete.
Si Negros Oriental Provincial Police Office (NORPPO) Provincial Director Police Colonel Julian Entoma miingon nga sugod niadtong Biyernes gi- awol na nila si Police Corporal Roger Rubio.
Giingong wala na mo-report sa iyang unit sa Negros Oriental Provincial Mobile Force sa Dakbayan sa Tanjay si Rubio human sa hitabo pagpatay sa brodkaster nga si Dindo Generoso diha sa Barangay Piape sa maong dakbayan.
Dugang pa ni Entoma giputol na usab nila ang sweldo ug uban pang mga benepisyo ni Rubio kinsa gituohang nagtagotago na ug gilusad ang manhunt operation batok kaniya human nangadakpan ang duha niya ka mga kauban pag-ambush sa maong blocktimer.Tungod kay aduna kini armas ug kun dili niya kini iuli, mapatong kini sa iyang atubangong kaso.
Samtang gimandoan ni Police Regional Office 7 Director Police Brigadier General Valeriano De Leon ang NORPPO nga palapdan pa ang manhunt operation kang Rubio. Tinguha nila nga madakpan ang maong polis aron masayran kinsa ang mastermind sa pag-ambush sa komentarista.
“The focus now of the ongoing investigation is to identify the mastermind. And believe me, we will get the culprit to justice,” dugang pa ni De Leon.
Una nang nadakpan ang duha ka driver nga silang Teddy Reyes 44, nga taga barangay Batinguel ug Police Corporal Glenn Corsame nga taga San Jose village barangay Banilad sa siyudad sa Dumaguete nga pulos mitudlo kang Corporal Rubio nga maoy nagpusil sa biktima. (/IBM)(BANATNEWS)
- Latest
