LTFRB-7 dunay back-up sa files

CEBU, Philippines — Gipahibawo sa direktor sa Land Transportation Franchising and Regulatory Board (LTFRB)-7 Eduardo Montealto, Jr. nga ang nasunog mao ang mezzanine floor sa ilang regional office diin siya ug si assistant regional director Reynaldo Elnar nag-opisina.

Niadtong Domingo sa kadlawon girespondehan sa Cebu City Fire Department and sunog nga miigo sa buhatan sa LTFRB-7 diha sa L. Briones Street, North Reclamation Area sa Dakbayan sa Sugbo.

Matud ni Montealto nga ang mga gamit nga naa sa ilang opisina nahurot sa pagkasunog apan dili angay kabalak-an tungod kay ang ilang back-up ug mga soft copy sa files naa sa silong.

Si Montealto nagkanayon nga sa pagkakaron giestablisar pa nila ang pagpahimutang aron dili mahunong ang ilang operasyon ilabi na karon nga daghan ang mokuha og special permit tungod sa holidays.

Temporaryo una silang mo ukopar diha sa ilang opisina sa Robinson’s Galleria sa buhatan kaniadto sa Land Transportation Office (LTO)-7 sa maong mall.

Gawas niini, ang opisina usab sa LTO-7 diha sa Natalio Bacalso Avenue kong tugotan sila nga mo ukopar sa third floor sa building ug ang LTO mobalhin diha second floor.

“Medyo dugay-dugay pa gyud ta makabalik sa atong dating regional office tungod sa nahitabo kay kinahanglan paman to i-rewire kay mao man toy problema gyud mga wirings adto”, asoy ni Montealto. BDB (BANATNEWS)