Ambush ipasulbad sud sa usa ka buwan
CEBU, Philippines — Gihatagan sa Police Regional Office 7 og usa ka buwan ang Special Investigation Task Group - Navarro pagsulbad sa pagpatay kang Clarin, Misamis Occidental Mayor David Navarro niadtong Biyernes sa udto.
Si PRO-7 Director Police Brigadier General Valeriano de Leon miingon nga dili niya gustong hilaw ug huyang ang kasong ilang mapasaka batok sa mga mamumuno.
Dugang pa ni de Leon nga bisan pa adunay mga impormasyong nakuha ug pagduda ang pamilya ni Navarro ila pa kini i-validate.
“Let’s give the SITG a time to calibrate all informations,” matud pa ni de Leon.
Samtang andam usab ipaubos og imbestigasyon ang mga sakop sa Abellana Police Station nga nag escort kang Navarro kung adunay pagkuwang sa pagpatuman sa seguridad nga makita ang SITG sa dagan sa imbestigasyon.
Subay niini gitahasan ni de Leon si Cebu City Police Office Director Police Colonel Gemma Vinluan nga maoy mo evaluate sa Abellana Police Station.
Giklaro usab ni De Leon nga misulay pagbawos ang kapolisan ngadto sa mga mamumuno apan naglisud kini tungod ky gipaulanan na sila og bala .
Sa pagka karon gisusi sa SITG ang lugar ug mga silingan niini kung adunay CCTV footages nga makuha sa area aron nga makatabang sa dali nga imbestigasyon.
Si Vinluan miingon nga nakaluwat na og pinanumpaang pamahayag ang mga kauban ni Navarro nga sakay sa Starex van. Si Vinluan miingon nga dako ang matabang sa mga makuha nilang impormasyon gikan sa mga suod nga higala ug kabanay sa mayor bahin sa hulga sa kinabuhi niini.
Apan ang problema dili sila mokooperar kung kinsa ug unsa nga grupo ang ilang gidudahan. IBM (BANATNEWS)
- Latest