Kapolisan, Ltfrb, andam na sa kalag-kalag

Cebu, Philippines — Andam na ang tibuok Police Regional Office 7 sa umaabot nga kalag-kalag.

Kini ang gibutyag ni PRO7 Director Valerino De Leon diin gihan-ay na nila ang pagseguro nga hapsay ang kalag-kalag sunod semana.

Istrikto nga lagda ang ipatuman sa mga dagku nga sementeryo sa Central Visayas.

Ang Cebu Provincial Police Office magpakatap sa ilang mga polis sa mga sam-ang ug mamutang og mga Police Assistance Desk gawas sa sementeryo.

Awhag ni Police Major Florendo Fajardo, hepe sa operation branch sa CPPO, sa publiko nga likayan ang pagdala sa mga ginadili sama sa mahait nga hinagiban, ilimnon nga makahubog ug uban sa mga sam-ang aron dili makasugat og problema.

Sa Dakbayan sa Sugbo, gibutyag ni Police Major Eduard Sanchez, hepe sa Abellana Police Station, nga moabag sila sa pagbantay sa Carreta Cemetery sanglit wala silay sementeryo nga sakop sa ilang area of responsibility.

Ang Cebu City Police Office (CCPO) ug Cebu City Transportation Office nipresentar sa ilang mga plano sa konseho alang sa umaabot nga kalag-kalag.

Matud ni CCPO Deputy City Director Melbert Esguerra nga bantayan nila ang 23 ka sementeryo sa dakbayan lakip na sa mga pribado.

Lakip sa bantayan sa ilang mga sakop ang mga terminal sa mga bus ug mga GT express terminals, Busay Flower Farm ug Freedom Park.

Ang CCTO mopatuman sab og rerouting sa mga sakyanan sugod sa Oktubre 30 hangtud na sa Nobiyembre 2 ug maggahin og parking area sa mga sementeryo.

Gitambagan sa CCTO ang mga motorista, drayber, ug uban pang dunay mga sakyanan nga sundon ang mga karatola sa trapiko aron maminusan ang huot sa dagan sa mga sakyanan atol sa maong mga adlaw.

Sa ilang bahin, ang Land Transportation Franchising and Regulatory Board magsugod na og monitor sa mga terminal subay sa kalag-kalag.

Sigun ni LTFRB-7 Assistant Regional Director Reynaldo Elnar nga nagsugod kagahapon ang ilang pag-monitor sa mga terminal sa rehiyon.

Ang mga gibantayan nga terminal sa ahensiya mao ang Cebu North Bus Terminal ug Cebu South Bus Terminal, mga terminal sa Negros Oriental ingon man sa Probinsiya sa Bohol.

“Ang order gyud nato nga kinahanglan kompleto og mga documents ang atong sakyanan, gilikayan nato mga kolorum kay simbako unsay mahitabo makalolooy atong mga pasahero ug kining road worthiness ato pud na i-apil kinahanglan kompleto og mga vault ang ligid sa atong sakyanan especially kini pud overloading gilikayan nato na,” asoy ni Elnar.

Si Elnar niingon nga ang ilang mga inspectors mo-roving sa mga terminal ug seguruhon nga matag bus nga mogawas sa terminal kinahanglan makita nila nga kini road worthy.

Mohatag sab ang LTFRB og special permit sa mga bus operators aron ang ilang mga bus mahimong makadagan gawas sa ilang rota.

“Special permit na siya pero maoy akong giingon nga dili mosobra sa 25 percent sa authorized unit niya anang rotaha kay ma more than 25 percent giingnan na sa atong officer murag gi-abandon na iyang main nga rota,” pagklaro ni Elnar. GMR ( BANAT NEWS)