Ex-vice mayor sikop sa investment scam

CEBU, Philippines — Lima sikop atol sa entrapment operation sa Criminal Investigation and Detection Group sulod sa coffee shop sa Dakbayan sa Mandaue.

Giila ang mga dinakpan nga sila si Ailyn Hope Matulac, 41, kinsa maoy subject sa operasyon ug mga kauban niini lakip na ang kanhi bise mayor sa Dakbayan sa Cagayan de Oro City nga si Caesar Ian Acenas, Arjon Gumban, 26; Maria Esperanza Makiano, 34, ug Adjetor Daya Jr., 35, pulos gikan sa Mindanao.

Matud pa ni Police Major Edwin Lacostales, hepe sa CIDG-Mandaue Field Unit, nga nakadawat sila og reklamo gikan sa usa ka biktima kalabot sa pagpangilad sa bag-ong investment scheme sa Metro Cebu.

Ang modus mao ang pagpasalig nga modoble ang kwarta nga gi-invest sulod lang sa 45 ka adlaw sa kompanya nga Phoenix EA Holding International Inc. samtang dunay mga beauty products ang ihatag sa buot nga mo-invest.

Usa ka 47-anyos nga ka kanhi Overseas Filipino Worker nga taga Luzon ang nidangop sa CIDG batok sa maong grupo diin naka-invest siya og P1 milyon niadtong Mayo apan hangtud karon wala pa siya kadawat sa gipasalig nga madoble ang kwarta nga iyang gi-invest nga gipanag-iya sa iyang mga kaubang OFWs.

Laing taga Cagayan de Oro City ang nabiktima sab sa maong grupo ug naka-invest og P1 milyon ug wala kadawat sa gisaad nga interest nga makuha gikan sa ilang gi-invest.

Gibutyag ni Lacostales nga abli ang buhatan sa CIDG-7 nga modawat pa og laing reklamo batok sa grupo.

Nagsugod ang maong investment scheme sa Mindanao diin mokabat na sa P400 milyones ang natigum sa kompaniya gikan sa mga nabiktima.

Nakuha gikan sa posisyon sa mga dinakpan ang P10,000 nga boodle money, armas nga caliber .45 pistol, magazine nga adunay walo ka bala ug sakyanan.

Kasong kalapasan sa Section 28 sa Republic Act No. 8789 o ang Security and Exchange Commission Code ug Illegal Possession of Firearms human makuha og armas ang body guard ni Matulac. GMR (BANAT NEWS)