P500 milyon shabu shipment padung Cebu nasakmit

CEBU, Philippines — Shipment nga kapin P500 milyones nga gidudahang shabu nga dad-on unta padung sa Sugbo nasakpan sa kapolisan diha sa Barangay Buñagan, lungsod sa Gandara, Samar, Huwebes sa hapon.

Tungod sa pagkasakop sa maong mga illegal nga drugas gimando karon ni Cebu Provincial Police Office Provincial Director Police Col. Rhoderick Mariano nga mas pahugtan pa ang pagbantay ug pagpaniid sa kabaybayonan sa Sugbo.

Gimandoan niya ang mga hepe sa kapolisan sa kalungsoran nga makig-alayon sa Coast Guard ug Port Police pagbantay sa pantalan ilabi na sa mga kargamento nga moabot gikan sa gawas sa Sugbo ug ingon man ang kabaybayonan nga posibleng agian sa illegal nga drugas.

Sumala pang Mariano, maayo kaayo ang koordinasyon sa intelligence community ug sa mga molupyo sa nahitabo didto sa Samar tungod kay wala pa gani makasulod nasakpan dayon kini.

Matud niya kung nakasulod pa kini dinhi sa Sugbo dako gayud kini nga problema.

Nakig-alayon na ang RID sa Central Visayas aron masayran kung unsa nga grupo ang mga nadakpan ug kun kinsa ang hatdan niini dinhi sa Sugbo.

Samtang ang Deputy Regional Director for Administration Police Colonel Ildebrandi Usana, nitug-an mas pahugtan pa nila karon ang seguridad ilabi na ang pagpahigayon ug checkpoints sa mga strategic nga lugar.

Awhag ni Usana sa publiko nga makig-alayon sa kapulisan ug motaho kung aduna silay mga kasayuran nga makaylap gikan sa mga nalambigit sa illegal nga kalihukan.

Ang unom ka mga tawo apil ang menor de edad, nasikop sa Philippine Drug Enforcement Agency Eastern Visayas niadtong Huwebes ug nakuhaan og 80 kilong gidudahang shabu nga mobalor og P594,400.00 base sa Dangerous Drug Board value.

Ang mga nasikop mao sila si Jeralou Rapuela, Elbert Abella, pulos taga Barangay Lutopan, Toledo City; Cesar Uy ug Steven Perez, taga Barangay Mambaling, Cebu City;  Leonard Delos Reyes taga Mandaue City ug usa ka 14 anyos nga batang lalaki nga taga Cebu City gihapon.

Ang grupo nadakpan sa gibutang sa police checkpoint sa PDEA-8 inabagan sa Gandara Policce, Regional Special Operations Group (RSOG), Regional Mobile Force Battalion (RMFB) Regional Drug Enforcement Unit (RDEU) 8, ug Samar Provincial Drug Enforcement Unit (SPDEU).  Ang tigpamaba sa PDEA-8 Rogelette Urgel, nitug-an buwan pa sa Septiyembre nila gipanid-an ang grupo human dunay nihatag kanila og impormasyon nga ang maong lugar maoy lutsanan sa ipadala nga illegal nga drugas padulong sa Sugbo. (/IBM)(BANATNEWS)