Lalaki gipusil patay, dunay gidudahang drugas nakuha
CEBU, Philippines — Patay ang usa ka 36-anyos nga lalaking nagmotor sa may 3rd Street, Felina Village, Barangay Tisa sa Dakbayan sa Sugbo human kini gipusil sa wala mailhing mamumuno, Huwebes sa gabii.
Ang biktima mao si Mark Brian Samson Lopez, residente sa dalan Tres de Abril, Barangay Labangon ning dakbayan. Samtang ang mamumuno wala mailhi.
Base sa inisyal nga imbestigasyon sa kapulisan naglingkod ang biktima sa iyang motor ug nakighinabi pa kini sa wala mailhing mamumuno.
Matud pa kalit lang nga niibot og armas dayon pusil ngadto kang Lopez. Ang biktima nakaangkon ug samad pinusilan sa tuong aping nga maoy gituohang naingnan sa hinanali niini nga kamatayon.
Human sa pagpamusil dali nga nakasibat ang gikatahapan. Padayon pa ang imbestigasyon sa kapulisan pagtino sa motibo sa pagpatay sa biktima. Apan usa sa ilang gisubay ang kalambigitan sa illegal nga drugas.
Nasakmit gikan sa crime scene ang usa ka medium size nga paketeng gituohang shabu, usa ka kalibre 45, motor, helmet ug ubang mga dokumento. IBM (BANATNEWS)
- Latest
