Horror park sa Mandaue buksan

CEBU, Philippines – Magsilbing kalingawan sa pagsaulog sa adlaw sa mga kalag ug mga Santos sa Nobiyembre 1 ug 2 niining tuiga ang pasiugdahan nga Parkmall Horror Park 2019 sa North Reclamation Area sa Dakbayan sa Mandaue.

Buksan kini karong adlawa ug molungtad kini hangtud sa Nobiyembre 10.

Kini gipasiugdahan sa tagdumala sa maong mall ingon man ang Kaabag Mandaue tumong sa pagtabang sa giatiman nga mga bata nga anaa sa Hope for Mandaue sa Dunggoan, Barangay Basak sa dakbayan. Ang pasilidad maoy nahimutangan sa gatusan ka batan-on sa dakbayan nga gitawag og Children in Conflict with the Law (CICL) ingon man mga bata nga giabandonar sa ginikanan o biktima sa pagpangabuso.

Ang buhatan sa City Social Services sa maong dakbayan ang giabagan usab sa pag-atiman sa unang ginang sa dakbayan nga si Sarah Walker-Cortes nga mao usab ang chairperson sa Mandaue City Council for the Protection of Children.

Ang gibuksan nga Horror Park ang nagdala sa tema karong tuiga nga “13th Floor: Enter At Your Own Risk.”  Bukas kini sugod alas 3 sa hapon hangtud sa alas 11:30 sa gabii sa P50 lang nga entrance fee.

Sa mosunod na nga mga adlaw anaa na kini sa P60 nga maoy regular rate alang sa pagsulod sa Parkmall Horror Park 2019.

Adunay pipila nga gidili nga himoon sa mosulod sa nahisgutang Horror Park nga naglakip sa dili pagpasakit ngadto sa scare actors sanglit ang bisan kinsa nga mohimo sila pagawson.

Ang mosulod sa nahisgutang Horror Park kinahanglan gyud nga mosubay sa mga lagda nga gitumong alang sa kasegurohan o paglikay sa mga kadaut nga mahitabo nga naglakip na ang pagdili sa pagdala og hait nga mga butang. (/GMR)(BANAT NEWS)