Lalaki nga natulog gipusil patay

CEBU, Philippines – Patay  ang usa ka 38- anyos nga lalaki nga kalit lang gipusil sa wala pa mailhing mamumuno samtang natulog ang biktima diha sa Purok  Tarnate,  Sitio  Sapa-Sapa, Barangay  Ibabao  Estancia,  Dakbayan  sa Mandaue sa miaging gabii.

Si  Police  Staff  Sergeant  Christian  Avila sa Presinto 1  sa  Mandaue  City  Police  Office (MCPO)  miila sa biktima nga mao si  Alan Lequin, nga nagpuyo sa maong dapit kinsa namatay human makaangkon kini og samad pinusilan sa iyang apapangig.

Matud pa ni Avila nga ang ama-ama  sa namatay nga si  Rene Cabahug  miasoy nga natulog sa bangko sa gawas  sa ilang balay ang biktima dihang nakadungog sila og lanog nga buto sa armas.

Nakita pa ni Avila ang wala hiilhing lalaki nga nagtabon og panapton sa iyang nawong nga nagdali  sa pagsibat  pahilayo sa maong  dapit ug maoy gituohan niyang nagpatay sa iyang humagbos.

Ang maong lalaki misakay sa nagpaabot nga motorsiklo diha sa G. Ouano  Extension ug dali nga miliko  sa wala paingon subay sa dalan S.B.  Cabahug.

Tulo ka basiyo sa bala sa kalibre .45 ang nakuha sa crime scene.

Dako ang pagtuo sa pamilya sa namatay nga naalaan lang kini tungod kay wala man silay nasayran nga aduna kini gikabangi. (/IBM)(BANAT NEWS)