11 ka girls scouts nalanag

CEBU, Philippines — Nalandig sa tambalanan ang 11 ka mga sakop sa Girls Scouts of the Philippines nga tinun-an sa Manguiao National High School sa Barangay Manguiao, bukiran nga barangay sa Lungsod sa Asturias  human nangalanag sa ilang gikaon niadtong Sabado sa hapon atol sa ilang camping.

Matud pa ni Police Staff Sergeant Bendie Nuñez, Desk Officer sa Asturias Police Station, dunay nipahibalo kanila nga dunay mga batang babayeng nag-camping didto sa maong eskuylahan ang gidala sa tambalanan.

Ang mga bata bata nagpangidaron 12 ngadto sa 17-anyos nga nisalmot sa kalihokan sa ilang tunghaan.

Sumala pa ni Nuñez, base sa initial nga pakisusi sa ilang imbestigador nagluto ang mga bata og sinangag nga kan-on gamit ang bahaw apan hilaw nga kan-on nga salin pa niadtong Biyernes.

Ang fried rice gisubakan og pork asado ug mao ilang gikaon sa paniudto.

Apan  pagabot sa alas -4 nagdungan og reklamo ang mga bata nga nanakit ilang mga tiyan. Ang mga “Titas” (mga magtutudlo) daling midala kanila sa clinic sa eskuylahan.

Apan walo lang sa mga bata ang naulian ug nakapauli niadtong Sabado sa gabii samtang ang tulo pabilin pang giatiman sa mga doktor atol ning pagsuwat sa balita.

Wala pa usab mopagawas og pamahayag ang mga kadagkoan sa maong tunghaan kabahin sa maong hitabo.

Gipaabot pa ang resulta sa laboratory test kun unsay nakaingon sa pagkalanag sa mga tinun-an. (/IBM)(BANATNEWS)