Bag-ong opisyales sa Red Cross sa Lapu-Lapu ug Cordova

CEBU, Philippines — Ang Philippine Red Cross (PRC) Lapu-Lapu/Cordova Chapter nagpili og bag-ong mga board of director atol sa ilang general assembly diha sa Mactan Convention Hall niadtong September 21, 2019.

Kini human nga ang unom sa mga BOD niabot na sa ilang duha ka tuig nga termino sa boluntaryo nga pagserbisyo sa chapter.

Apan gumikan sa pag-usab sa kategoriya sa paglambo niini gikan sa D ngadto sa C, nagkinahanglan na karon ang chapter og 22 ka miyembro sa  BOD gikan sa 18 ka miyembro.

Pito ang gikinahanglan gikan sa Dakbayan Lapu-Lapu ug upat ang gikan sa Lungsod sa Cordova.

Ang nahibilin nga mga miyembro sa BOD adunay managlahi nga termino nga mosobra sa duha ka tuig.

Matag BOD nituboy og duha ka pili-onon sa pagka- BOD kinsa mga impluwensiyado sa ilang komunidad.

Ang pito nga napili gikan sa Lapu-Lapu mao sila si Michol Anthony Cerna, senior HR specialist sa Gaisano Retail, Eric Monsanto, marketing and communications manager sa Blue Water Maribago Resort and Spa, Jeffrey Chua, tag-iya sa NAFLA Food Manufacturing, Dr. Joseph Abing, medical officer 3 sa Department of Education Lapu-Lapu Division, Jonas Quilantang, CEO, Uniform Solutions Inc., Norman Mendoza, reporter sa DYSS ug correspondent sa CDN Digital, ug Ferdinand Mañus, reporter/anchor sa DYAB.

Samtang ang upat nga napili gikan sa Cordova mao sila si Ximgil Dino Sitoy, bise mayor sa Cordova, Remedios Lupo, district supervisor sa DepEd Cordova, Vincent Benitez, DRRMO head sa Cordova ug Dr. Efren Dico Jr., Medical Officer-RHU sa Cordova.

Ang bag-ong mga napiling BOD nanumpa dayon ngadto sa vice chairman sa chapter nga si Mayor Teche Sitoy-Cho sa Cordova sa ngalan sa chairman nga si Dr. Mario Amores.

Sa laing bahin, ang PRC usa kini ka independent ug autonomous non-government organization diin ang tahas niini mao ang pagtabang sa gobiyerno sa Pilipinas kabahin sa humanitarian. Ang Pilipinas nituman sa obligasyon niini sa Geneva Coventions and International Red Cross ug Red Crescent Movements.

Niadtong Pebrero 14, 1947, ang Pilipinas niproklamar sa ilang commitment ngadto sa Geneva Red Cross Convention nga mao ang pag-umol sa PRC.

Ang pag-umol sa body natuman kini niadtong Marso 22, 1947 human si kanhi Presidente Manuel Roxas nipirma sa Akta Republika 95 aron kini mahingpit nga balaod.

Sukad sa pagkaumol sa Philippine Red Cross Charter ang nahisgutang balaod naagi kini og mga amendasyon ubos sa Akta Republika 855 ug 6373, Presidential Decree No. 1264 s. 1977, Ang orihinal nga charter ug amending laws ang gi-repealed kini niadtong tuig 2010 human si kanhi Presidente Gloria Macapagal-Arroyo nilagda sa Akta Republika 10072 kun "Philippine Red Cross Act of 2009". Ang Akta Republika 10072 mao kini nagsilbi karong charter sa PRC. (/BDB)(BANATNEWS)