Manindahay sa Carbon konsultahon kabahin sa modernisasyon

CEBU, Philippines — Gipasaligan ni Cebu City Mayor Edgardo Labella ang mga tindera sa Carbon Public Market nga madungog ang ilang baruganan bahin sa sugyot sa usa ka pribadong kompaniya nga modernisasyon.

Kini human nihangyo ang Cebu Market Vendors Multi-Purpose Cooperative nga kinahanglan sila ilakip sa mga konsultasyon sa gobiyerno sa siyudad ug SM Prime Holdings Inc. tungod kay supak sila sa "modernong merkado" nga sugyot.

Giingon ni Labella nga ang iyang opisina magpatawag og public hearing aron ang tanang apektado nga mga hingtungdan mahatagan og higayon sa pagsulti bahin sa sugyot sa pagpalambo sa Carbon Public Market.

“I will be very objective,” sigun ni Labella.

Giingon ni Labella nga ang SM Prime Holdings, Inc. wala pa magduso og proposal sa iyang opisina apan gihatagan na siya og ideya nga ang modelo alang sa proyekto mao ang SM Market Mall sa Dasmariñas, Cavite.

Samtang ang mga opisyal sa Cemvedco nibisita sa merkado sa Dasmariñas ug nakigtagbo sa tagdumala niini kaniadtong Miyerkules, Oktubre 2.

Sa ilang pagbisita nahibaw-an nga dili maayo ang kahimtang sa mga tinder kinsa gibutang sa usa ka lugar diin dili dayon sila makit-an sa mga mamalitay.

Ang chairman sa Cemvedco nga si Erwin Gok-ong Sr. niingon nga sa pagsulod sa building, ang mga opisina sa manager ug private office establishments ang nag-abi-abi sa mga namalit. Ang mga tindera nahimutang sa ground floor.

Matud pa ni Gok-ong nga kun mosulod ka sa building ug wala ka kahibalo nga adunay merkado didto, maghuna-huna lang ka nga kini usa ka SM Supermarket.

Giangkon ni Gok-ong nga sukad gi-develop sa SM ang public market, daghang mga magpapatigayon ang namaligya sa gawas sa establisemento tungod kay niubos ang ilang ganansya.

Atol sa Executive-Legislative Agenda Formulation Workshop kaniadtong Septiyembre 25, giingon ni Labella nga usa ka butang nga kinahanglan nga susihon sa gobiyerno kung ang sugyot makatabang ba sa kalamboan sa siyudad.

Adunay posibilidad nga ang Yunit 1, 2 ug 3 sa Carbon Public Market gubaon sa higayon nga masugdan na ang proyekto. (/GMR)(BANATNEWS)