PRO-7 nagpaluyo kang Albayalde
CEBU, Philippines – Gipasalig ni Police Regional Office 7 Director Debold Sinas nga ang tibuok hut-ong sa kapolisan sa Central Visayas ang padayong nagsuporta kang PNP Chief General Oscar Albayalde.
Matud ni Sinas nga bisan sa giatubang karon nga mga hagit sa ilang Chief PNP, padayon gihapon silang nagsuporta ug gani wala sila mohunong sa ilang mga operasyon diin dili pa dugay nakakuha sila og duha ka kilo nga shabu sa Dumaguete City ug adunay mga nagpadayon usab nga mga operasyon sa Sugbo.
Sumala pa ni Sinas nga wala sila nag-low morale bisan pa man sa mga panghitabo sa Senado tungod kay sayud siya nga makadepensa si Albayalde sa iyang kaugalingon ug anaa ra silang mga polis nagpaluyo niini.
Siya nitug-an nga nihimo siya sa pagtuyok sa tanan niyang ginsakopan aron sa pagpahinumdum sa pag-obserbar lang sa nahitabong hearing ug magpadayon sa ilang mga gimbuhaton ug dili magpa-low morale kay mogawas ra ang kamatuoran sa umaabot.
Gitug-an ni Sinas nga sayud siya nga ang Chief PNP makamao sa pag-atubang sa iyang mga hagit karon ug daghan usab kining mga kabag-ohan nga gipatuman sa kapolisan.
Malaumon si Sinas nga mahuman ra ang giatubang nga mga hagit karon sa ilang mga upper class. (/GMR)(BANAT NEWS)
- Latest
