Nag-refill og ‘butane’ sikop sa Talisay

CEBU, Philippines – Sa paghingusog sa kapulisan sa Siyudad sa Talisay baotk sa ilegal nga pag-refill LPG ngadto sa mga iglalabay nga lata sa butane aduna gyud silay nasampolan sa pagdakop niadtong Miyerkules sa alas 11 sa gabii.

Ang nasikop mao si Ricardo Daus, 43, diha Barangay Lagtang sa maong siyudad. Ang operatiba sa Bulacao Community Police Station nakatayming gyud ni Daus nga nag-refill og butane canisters og LPG nga peligroso kaayong moulbo ug makamugna og sunog.

Nasakmit sa mga operatiba ang duha ka 50 kilograms nga tangke sa Liquefied Petroleum Gas (LPG) ug 150 ka mga butane canisters.

Si Police Major Orlando Carag Jr., hepe sa kapulisan sa maong siyudad miingon nga hugot ilang operasyon batok niini.

Sa miaging adlaw nga Martes miulbo ang usa ka illegal nga refilling station sa Barangay San Roque sa mao gihapong dakbayan.

Si Mayor Gerald Anthony “Samsam” Gullas Jr. nimando sa kapulisan ug kabomberohan pangusgan ang pagpangita niining maong illegal nga refilling stations tungod kay daghan na ang napagan.

Si Daus ang pasakaan og kaso sa iyang kalapasan sa Presidential Decree 1865. (/IBM)(BANAT NEWS)