Buhatan sa gitara naugdaw sa sunog
CEBU, Philippines — Naugdaw sa nahitabong sunog ang buhatan og gitara nga nahimutang diha sa Sitio Abuno, Barangay Pajac, Dakbayan sa Lapu-Lapu niadtong Lunes sa gabii.
Ang guitar factory nga nasunog mao ang New Susing’s Guitar nga paganag-iya sa pamilyang Valiente.
Ang kabomberohan nipaubos sa second alarm sa nahisgutang sunog.
Ang mga fire truck gikan sa Marigondon Fire Sub-station ug ingon man sa Barangay Babag sa maong dakbayan dali nga nitubag sa alarma sa maong sunog.
Si Fire Officer 1 Rowel Brañanola sa Lapu-Lapu City Fire Station nagkanayon nga kutob lang sa alas 5:00 sa hapon ang trabaho sa mga trabahante niini.
Matud Brañanola nga dihang niulbo ang kayo sa sunog walay tawo diha sulod sa factory.
Ang kayo sa sunog giingong nagsugod diha sa sanding area diin nahimutang ang ubang materyales alang sa paggama og gitara, mga ekipo nga naglakip sa makina nga gigamit alang sa paglimpiyo ug mga kemikal nga gigamit sa pagpasinaw sa gitara.
Dugang ni Brañanola nga nakontrolar ang kayo sa sunog mga alas 8:09 sa gabii ug alas 8:25 sa gabii hingpit na nga napawong ang kayo.
Hinupn wala gikataho nga naangol o nakalas sa maong sunog. (BDB) (BANAT NEWS)
- Latest