2 ‘pushers’ napusilan; P3 milyong shabu nasakmit
CEBU, Philippines — Duha ka gipasanginlang drug pushers ang nangapusilan sa anti-drug operations sa mga sakop sa Presinto 3 sa Mandaue City Police Office (MCPO), samtang sa laing operasyon kapin sa P3 milyones nga kantidad sa gituohang shabu sa Cebu City niadtong adlaw nga Martes.
Sa Sitio Liong, Barangay Alang-Alang sa Dakbayan sa Mandaue napusilan sa grupo ni Police Captain James Conaco, hepe sa Presinto 3, sila si Louie Boy Pagaratan, 32, ug William Lapazaran, 39. Ang duha nalandig sa tambalanan human napusilan sa ilang mga bitiis.
Nadakpan sab si Ozzy Baclayon, 25, ug Marevel Pagaratan, 30, tungod sa giingong sulay nga mibabag sa mga polis pagsikop sa duha.
Matud pa ni Conaco nga si Baclayon nakuhaan og napulo ka gagmay nga paketeng shabu samtang sila si Louie Pagaratan ug Lapazaran nga nakamatikod nga polis ang nagpalit kanila og shabu dali kining miibot sa ilang armas ug namusil apan wala kini makaboto ilang mga armas maong naunhan.
Ang duha gidala ngadto sa Mandaue City Hospital ug nakuha gikan kanila ang mokabat sa P30 mil nga kantidad sa shabu, usa ka kalibre .45 ug usa ka .22 Magnum revolver nga adunay mga bala.
Laing nadakpan mao si Joseph Costaños, 23, sa operasyon sa mga sakop sa Drug Enforcement Unit (CDEU) sa MCPO sa Barangay Subangdaku.
Sa Cebu City, sobra sa P3 milyones nga balor sa illegal nga drugas ang nasakmit sa managlahi nga buy-bust operation sulod sa 24 oras.
Sa unang operasyon, nahitabo kini sa Sitio Mansanitas, Barangay Cogon ug nadakpan si Raymund Lauron, 37, ug Jovanie Estillore, 39. Nangulo sa maong operation mao si Police Major John Kareen Escober, hepe sa Police Station 7 uban sa pakig-alayon sa PDEA-7.
Nasakmit gikan nila ang kalibre 45 nga adunay mga bala ug drugas nga mobalor og P176 mil base sa Dangerous Drug Board Value ug buy bust money.
Sa ikaduhang operasyon, nasikop si Dinalyn Mata, 19, taga Sitio Little Hawai 1, Cogon Pardo. Nakuhaan kini og 350 gramos nga gidudahang shabu nga mobalor og P2.3 milyones.
Nasikop sab sa Sitio Lawis Barangay Pasil sila si Arnel Silab, 34, regional high value target; Marlon Clark Dacua, 21, ug Jennifer Murillo, 40, taga Sitio Acacia, Barangay Lorega-San Miguel.
Nasakmit gikan sa mga dinakpan ang 115 gramos nga gituohang shabu nga mobalor ug P782 mil ug ang buy-bust money. Ang tanang mga dinakpan nagtingkagol na karon sa prisohan ug pasakaan og kasong kalapasan sa Section 5 ug Section 11 sa Article II sa R.A 9165. (IBM) (BANAT NEWS)
- Latest