Tubig problema sa bag-ong merkado sa Mandaue

CEBU, Philippines —  Nahimo karong suliran sa mga naninda sa merkado publiko ang pagmintinar sa ilang kalimpiyo tungod sa nasinati nga kakuwang sa supply sa tubig alang sa pagpanghugas.

Matud ni Mosuline Suliva nga maoy market administrator nga gumikan sa maong suliran maoy giplano karon ni Mayor Jonas Cortes ang pagpangita og laing water provider.

Gitataw ni Suliva nga gikinahanglan ang daghang supply sa tubig sa merkado sanglit maoy ilang tinguha ang pagmintinar sa kalimpiyo.

Dugang ni Suliva nga ang mga stalls sa nahisgutang merkado nga nagkinahanglan gyud og daghang supply sa tubig matag adlaw mao ang isdaan ug karnehan.

Laing nagkinahanglan og daghang tubig mao ang mga kan-anan alang sa ilang pagpanghugas sa giluto nga pagkaon ug mga kahimanan sa mangaon nilang mga kustomer.

Si Suliva niingon nga ilang gitinguha ang kalimpiyo sa palibot sa merkado hinungdan nga ilang gibutangan og water treatment facility nga ang tubig nga mogawas limpiyo na daan paingon sa mga kanal.

Samtang ang 100 ka vendors nga nagtinguha sa pagbaton og pwesto sa maong merkado ang nipakita na og kaikag sa pagsalmot sa ikaduhang hugna sa raffle.

Si Suliva niingon nga ang maong gidaghanon sa mga vendors ang makaapil sa raffle sanglit natuman na man nila ang gikinahanglan nga mga rekisito.

Matud ni Suliva nga ilang gihatagan isip first priority kadtong mga naninda sa karaan nga merkado nga wala makasinati og mga kakulian sa giukopar nga pwesto sa karaan nga merkado.

Naglakip na niini ang walay napundo nga bayranan sa kanhi giukopar nga pwesto ug sinsiro nga nagsunod sa mga lagda nga gipatuman sa merkado publiko ug ingon man ang mga matang sa ibaligya sa okupahon nga pwesto.

Ang bag-ong merkado gibuksan niadtong Agosto 28 diin dunay 1,194 ka stall ug sa kasamtangan aduna pa kini bakante nga 300 ka stalls nga maoy ilang gipaningkamutan nga hingpit na nga maokupar human sa ikaduha ug ikatulo nga raffle niini.

Si Suliva niingon nga ang karaan pa nga market code maoy gibasehan sa kantidad sa ilang pagpaabang sa pwesto gikan sa P36 nga abang sa matag adlaw ngadto sa P100. (GMR) (BANATNEWS)