P13.6 milyones nga shabu

CEBU, Philippines — Mokabat  sa P13.6 milyones nga gidudahang shabu ang nasakmit sa buwag nga operasyon sa kapolisan gikan sa Dakbayan sa Sugbo ug Lapu-Lapu sa miaging gabii.

Sa operasyon sa Sitio Mustang sa Barangay Pusok sa Dakbayan  sa Lapu-Lapu alas 11 pasado ang takna sa miaging gabii, P6.8  milyones  nga gituohang  shabu ang nasakmit gikan  sa managkapuyo nga taga Dakbayan sa Sugbo.

Si Police Lieutenant Colonel Mark Gifter Sucalit nga maoy hepe sa City  Intelligence Branch   (CIB) sa Lapu-Lapu  City  Police  Office (LLCPO) nga maoy nangulo sa maong operasyon miila sa managkapuyo nga sila si Staley Urdaneta, 37,  ug Arcelia Tamarion, 35, taga Dakbayan sa Sugbo apan nagpuyo sa Barangay Estaca, Lungsod sa Compostela.

Matud pa ni Sucalit 11 ka dagkong putos sa gituohang shabu ug usa ka kalibre .45 nga puno sa bala ang nakuha gikan sa duha.

Si Mayor Junard  ‘Ahong’ Chan  nisaksi sa pagsikop sa duha.

Laing operasyon sab ang gihimo diha sa Purok Mangga sa Barangay  Gun-ob pinangulohan ni Police Major Wayne  Magbanua ug nadakpan silang Greg  Malinao, 42, Mark  Dejito, 31,  ug Janny  Salinguhay, 35, taga Sitio  San Roque  sa Barangay Mactan ug nasakmit gikan kanila ang P10,064  nga kantidad sa shabu, P1,000  nga marked money ug P500 nga gituohang halin niini.

Sa laing operasyon, usa ka kilong gituohang shabu ang nasakmit gikan sa 29-anyos nga si Niño Develos sa buy bust operation nga gihimo sa mga sakop sa Mandaue City Police Office  Station 1 diha sa Happy Valley, Barangay Guadalupe ning Dakbayan sa Sugbo kagahapon sa kaadlawon.

Si Develos, residente sa maong lugar gikonsiderar nga usa ka regionwide high value target.  Nakig-alayon ang kapulisan sa PDEA7 human kanunay mogawas ang pangalan sa dinakpan sa higayon aduna silay madakpang drug pushers.

Nasakmit gikan kang Develos ang mga pinutos sa ginadiling drugas nga mobalor og P6.8 milyones pesos base sa Dangerous Drug Board Value, buy bust money ug sling bag nga sudlanan.

Si Police Major Ramil Morpos miingon nga ang nasakmit nga illegal nga drugas toa na gidala sa PNP Crime Laboratory 7.

Giandam na karon sa kapulisan ang pagpasang-at ug tukma nga kasong kalapasan sa Sec 5 and 11, Art 2 of R.A 9165, samtang nagtingkagol kini karon sa lock-up jail.  Sa Dakbayan sa Talisay, daghang nangadakpan sa gilusad nga lapad nga operasyong gitawga og Oplan Hook diin lima ka search warrants ang gi-serve batok sa mga gidudahang nalambigit sa kriminalidad ilabi na sa illegal nga drugas.

Ang operasyon gihimo sa dul-an 200 ka mga polis gikan sa maong dakbayan, RSO-7, PDEA-7 ug mga sakop sa San Fernando Police Station .

Usa sa mga gironda ang panimalay ni Flor “Madam Flor” Marcelo, 55, diha sa Sitio Mananga sa Barangay Tabunok.

Si Police Major Orlando Carag Jr., pangu sa kapulisan sa Syudad sa Talisay nibutyag nga kanunay molutaw ang pangalan ni Marcelo matag duna silay madakpang durugista.

Nakuha gikan sa iyang balay ang wala pa matinong gidaghanon sa ginadiling drugas, drug paraphernalia ug mga gamit pag-repack niini.

Apan gihimakak ni Marcelo ang pasangil tungod kay niundang na siya sa matang sa negusyo kay nagsalig nalang siya sa sustento sa anak nga toa sa gawas sa nasud.

Apil sa gidakop diha sa balay niini lima ka tawo apil iyang usa ka anak nga lalaki. Si Kapitan Benjie Cabigas sa Tabunok miangkon nga numero uno gyud nilang problema sa Mananga 1 ug Mananga 2 ang illegal nga drugas. Apan matud niya, ang mga nalambigit niini dili lumad sa lugar.

Sa pagsuwat niining balita wa pa mahuman ang mga operatiba sa imbentaryo sa tanan nilang nasikop ingon man ebidensya nga nakuha sa ilang mga dinakpan.

Gibana-bana hinuon nga miabot na ngadto sa 25 ngadto sa 30 ka mga durugista ang nadakpan sa maong operasyon. (Rowena Capistrano, Gabriel Bonjoc/IBM)(BANATNEWS)