Lounge fee sa mall sa danao port ipahunong
CEBU, Philippines – Gusto ipaimbestigar ni Kongresista Vincent Franco “Duke” Frasco ang pagpangolekta og P20 nga lounge fee sa usa ka mall kilid sa pantalan sa Dakbayan sa Danao sa mga pasahero nga motabok sa Isla sa Camotes.
Si Frasco niduso og resolusyon nga nag-awhag sa House Committee on Transportation sa pag-imbestigar sa gihimo sa Sands Gateway Mall sa Dakbayan sa Danao.
Matud ni Frasco nga sa wala pa ang maong mall wala nagbayad og P20 ang mga pasahero gawas sa P5 nga terminal fee sa pantalan.
Lakip sa gihangyo ni Frasco ang Department of Tourism ug Cebu Port Authority nga ipahunong ang pagpangolekta sa mall sa lounge fee sa mga pasahero.
Giawhag sab ni Frasco ang duha ka ahensiya nga buksan pagbalik ang public terminal aron nga maoy magamit sa mga pasahero nga mobiyahe padulong sa isla. Si Frasco kinsa kanhi commissioner sa CPA nagkanayon nga wala siya kahinumdum nga dunay pirmahanay nga nahitabo kalabot sa pagsirado sa public terminal sa pantalan ug nagmando sa mga pasahero nga adto sa mall maghuwat sa ilang byahe.
“The Port of Danao City is a public commercial port owned and operated by the CPA, and currently has a 150-seater passenger terminal that is in good working condition,” matud ni Frasco.
Gihulagway sa kongresista nga dili makiangayon alang sa mga pasahero nga kolektahan sa maong bayranan. (/GMR)(BANAT NEWS)
- Latest