Polis patay sa drive-by shooting

CEBU, Philippines — Patay ang usa ka polis sa Lungsod sa Minglanilla human gipusil sa wa ilhing mamumuno diha sa National Road sa Barangay Linao-Lipata, lungsod sa Minglanilla kagahapon sa alas 2:50 sa kaadlawon.

Ang biktima mao si Police Senior Sergeant Alfredo Pagaling, 52, taga Barangay Vito sa maong lungsod. Si Pagaling mao ang team leader sa team bravo sa Mobile Patrol Section sa Minglanilla Police Station.

Siya ug ang iyang buddy nga si Police Corporal Allan Villasurda nagsakay ilang patrol car nga Toyota Hi-Lux nga nakaparada daplin sa karsada kay nagpaabot sa ilang kauban aron magpahigayon og checkpoint.

Si Pagaling naglingkod sa driver seat tupad si Villasurda. Matud pang Villasurda nakadungog siya og sipang buto sa armas mao nga mikanaog kini sa patrolcar ug nangita kun asa kini gikan.

Walay komosyon sa palibot maong mibalik siya sa patrolcar apan nahibulong siya nganong wala man mo-react si Pagaling ug wala na sab kini motingog.

Tungod sa pagduda mitawag siya og back-up ug ilang gidala si Pagaling sa South General Hospital apan nakabsan kini sa kinabuhi.

Si Police Colonel Roderick Mariano miadto sa crime scene ingon man sa tambalanan kun diin gidala si Pagaling. Giingong si Pagaling nakaangkon og usa ka samad pinusilan gikan sa wala nga milapos sa pikas nga bahin sa ulo nga nakaingon sa iyang kamatayon.

Matud pa nga sa gihimo nilang imbestigasyon, dunay duha ka mga lalaking gika-report nga namaregla diha sa Dakbayan sa Talisay ug nisibat sa direksyon sa Minglanilla ug dihang naagian ang patrolcar gipusil kini ug maoy naigo si Pagaling.

Apan si Police Corporal Kris Puerto, desk officer sa Talisay City Police Station miingon nga wala silay natala nga adunay nahitabong pagpamusil sa ilang area of responsibility sa wala pa mahitabo ang pagpamusil sa Minglanilla.

Samtang si Police Staff Sergeant Maidu Sanchez sa Minglanilla Police Station nagkanayon nga sa wa pa mahitabo ang pagkapusil kang Pagaling adunay usa ka Jude Romarez nga gipusil sa Dakbayan sa Talisay.

Nakita sab sa CCTV camera ang mga mamumuno nga mao gyud ang gitumbok sa testigos nga maoy nagpusil sa patrolcar.

Nagtuo ang kapulisan nga drive by shooting ang nahitabo ug ang riding in tandem nakurat lang nga dunay patrolcar nga nakaparking sa ilang agianan.

Sa pagsuwat ning balita wa pa gihapon makatumbok ang kapulisan kun kinsa ang responsable sa krimen ingon man ang motibo niini. (/IBM)(BANATNEWS)