Gi-salvage gianod sa Mactan Channel

CEBU, Philippines — Lalaki nga gituohang gi-salvage ang nakit-an wala nay kinabuhi sa may Bleaching Area Charlie sa Shell Island sa Lungsod sa Cordova kagahapon sayo sa kabuntagon.

Ang patay nga lawas wala pa mailhi hangtud ning pagbalita gibana-bana nga anaa sa 30-anyos ang pangidaron, naka shorts ug t-shirt diin halos mabulit sa tattoo ang kalawasan niini sa nagkadaiyang design.

Matud pa ni Police Master Sergeant Marven Ando, imbestigador sa Cordova Police Station, nakadawat sila og tawag gikan sa duty guard nga adunay nagutaw-utaw nga tawo sa lugar nga gibinaklid ang mga kamot nga wala nay kinabuhi.

Sumala pa ni Ando, dako ang ilang pagtuo, lakip ang mga mobile force nga naka deploy sa lugar nga dili kini diha gipatay kay wala may nakadungog og buto sa armas.

Dugang pa ni Ando, dako ang posibilidad nga dul-an sa 24-oras na human kini gipatay ang biktima ug aduna na usab mga paksit sa hulagway niini.

Apan mahimo pa kining maila sa mga tagtungod kung adunay mangita mahimo ra moadto sa ilang police station.

Ang biktima gituohan gikan kini gipatay sa may habagatan nga bahin sa Sugbo ug nadala lang sa maong lugar tungod sa sulog sa dagat.

Ang biktima nakit-an adunay samad sa iyang liogan nga gituohan agi ug pinusilan apan ipa- autopsy pa kini aron masuta gyud ang hinungdan sa iyang kamatayon.

Padayon pa ang kapolisan sa ilang imbestigasyon sa maong kaso. (Rowena Capistrano/IBM)

Gipatay sa kahantak

Patay ang usa ka 20-anyos nga lalaki human kini gipusil sa iya ra usab giingong nga kaduwa sa hantak sa may Sitio Lawis Alaska, Barangay Mambaling ning Dakbayan sa Sugbo.

Ang biktima naila nga si Michael Dela Cruz, taga Sitio Puntod Alaska, sa maong barangay. Samtang ang mamumuno wala mailhi.

Ang biktima giila sa iyang apohan sa dihang adunay nagpahibalo niini nga napusilan iyang apo.

Base sa initial nga imbestigasyon ang biktima kuyog sa mga estambay naghantak sa dihang giingong gikalalis niini ang suspetsado tungod lang sa pusta.

Ang biktima nakaangkon og samad pinusilan sa iyang ulo nga maoy hinungdan sa hinanali niini nga kamatayon.

Ang kapulisan sa Mambaling Police Station pinangulohan ni Police Capt. Francis Renz Talosig mihimo pa og imbestigasyon may kalabutan sa kamatayon sa biktima lakip ang pagsusi sa background niini. Pipila sa mga residente sa lugar ang nitug-an sa kapolisan kusog mangilad ug nagpayuhot ug illegal nga drugas ang biktima ug usa kini sa susihon sa kapulisan. (/IBM)(BANATNEWS)