P9 milyong shabu nasakmit
CEBU, Philippines — Mokabat sa P9 milyones kapin nga balor sa illegal nga drugas ang nasakmit atol sa gipahigayon nga anti-drug operation sa mga sakop sa Labangon Police Station nga gipangulohan ni Police Major Henrix Bancoleta nga gikasikop sa upat ka mga tawo sa may Sitio Viking Alaska, Barangay Mambaling sa Dakbayan sa Sugbo kagahapon sa kaadlawon.
Ang mga nasikop nailhan nga mao ang managsuong sila si Joven Gemperosa, 29; Benerando Gemperosa Jr., 27, Beverly Gemperosa Medina, 26, ug ang bana niining si Regie Medina, 28, mga residente sa lugar.
Nasakmit gikan kang Benerando ang 1.350 kilong gituohang shabu nga mobalor og P9,180,000 base sa Dangerous Drug Board Value hinungdan sa pagkasikop niini ug sa mga kaubanan.
Dugang pa ni Bancoleta, si Benerando naila nga usa sa mga dagko mga drug players sa dakbayan kay makabaligya kini og 400 gramos nga shabu matag semana.
Dul-an sa bulan ang pagpaniid sa kapulisan kang Benerando tungod kay tunog kaayo ang pangalan niini sa pagpayuhot og ginadili nga drugas.
Gisusi pa sa kapolisan ang tinubdan sa illegal nga drugas ni Benerando nga giingong gikan sa Mandaue City Jail. (/IBM)(BANATNEWS)
- Latest
