Ang motan-aw sa Pasigarbo sa Sugbo libre gihapon
CEBU, Philippines – Sa pagbalik sa Pasigarbo sa Sugbo karong Agosto 25, 2019 libre gihapon ang pagsaksi niini matud ni Gobernador Gwendolyn Garcia.
“There were suggestions nga ibaligya ang ticket but I said ever since libre man nang Pasigarbo. It will be free admission”, matud ni Garcia. Ang Pasigarbo sa Sugbo nga gikonsiderar nga “festival of festivals” sa Lalawigan sa Sugbo ipahigayon kini karong Domingo diin adunay street dancing gikan sa Kapitolyo hangtud diha sa Cebu City Sports Center sa ala 1:00 sa hapon .
Adunay ipahigayon nga showdown diha sa Cebu City Sports Center nga magsugod alas 6:00 sa gabii.
Nikabat sa 44 ka lungsod ug dakbayan ang moapil sa maong kalihukan diin matag usa kanila mopasigarabo sa festival sa ilang tagsatagsa ka lugar.
Matud ni Garcia nga iyang giimbitar si Davao City Mayor Sara Duterte- Carpio nga motambong sa maong kalihukan apan wala kini sa nasud atol sa nahisgutang adlawa.
Ang tanang mayor, bise mayor, regional ug provincial directors ang lakip nga giimbitar sa Kapitolyo nga mosaksi sa Pasigarbo sa Sugbo.
Kabahin sa premyo sa makadaog nga contingent si Garcia wala pa kini mobutyag.
“Wala pa, naghuna-huna pa ko, depende sa unsa ka nindot ang performance, if it’s worth over a million. Ang akong nadunggan murag grabe naman kuno ang practice. Unya dili man magpalupig, ang tanan gusto maoy mo-champion” matud ni Garcia. Ang uban mga lungsod sama sa Consolacion ug Liloan ang nisaad nga mohatag og hugyaw ug unique nga presentasyon nga mopakita sa kaanindot sa ilang lugar.
Kagahapon, unang gipresentar ang mga festival queen sa matag Local Government Unit nga moapil sa Pasigarbo sa Sugbo. (/BDB)(BANAT NEWS)
- Latest
