Labella: Matag barangay sa Sugbo hatagan og P5 milyones

Labella: Matag barangay sa Sugbo hatagan og P5 milyones

CEBU, Philippines – Padayonon ni Cebu City Mayor Edgardo Labella ang paghatag og P5 milyones kada barangay sa siyudad bisan sa mga dili kaalyado nga barangay.

Atol sa tigom kagahapon tali sa 80 ka kapitan sa kabarangayan sa siyudad si Labella nibutyag nga ang siyudad nigahin og P400 milyones ubos Annual Budget 2019 alang sa pinansiyal nga tabang sa mga barangay.

Matud ni Labella nga ang mga opisyal sa barangay kinahanglan nga mag-liquidate sa pungod nga gihatag sa siyudad kanila sa niaging mga tuig.

Si Labella nagkanayon nga ang kagamhanan sa siyudad posibleng mohatag og dugang P5 milyones nga tabang sa sunod tuig ngadto sa kabarangayan kong kini motabang sa siyudad sa pag-rehab sa mga agianan sa tubig ug pagkolekta sa mga basura.

Matud ni Labella nga mahimong magamit ang P5 milyones sa mga barangay sa bisan unsa nga proyekto basta ilakip niini ang paglimpiyo sa ilang barangay ilabi na sa tanang publiko nga lugar ug mga agianan sa tubig ug mga sapa ug ang pagkolekta sa basura. Ang maong pag-anunsiyo gihangop sa Association of Barangay Councils Cebu City Chapter tungod kay makatabang kini sa mga barangay sa pagpatuman sa ilang mga programa.

Si ABC president Franklyn Ong nibutyag nga sa pagkakaron ang siyudad nagpagawas na sa P5 milyones ngadto sa barangay Malubog ug Sawang Calero.

Matud ni Ong nga kasagaran sa mga sugyot sa mga kabarangay naglakip sa pagpalit og garbage trucks aron makatabang sa siyudad sa pagkolekta sa mga basura.

Si Banilad Barangay Kapitan Dennes Tabar nagkanayon nga kinahanglan nga ikonsidera usab sa executive department ang pag-deploy og barangay environment officers aron makapanakop usab sila sa mga malapason. (/BDB)(BANAT NEWS)