30 na-rescue, 3 bugaw sikop

CEBU, Philippines — Tulo ka mga gipasanginlang bugaw ang gidakop lakip ang usa ka minor de edad ug dul-an 30 ka mga babaye hamtong ug menor de edad ang na-rescue gikan sa Family KTV Bar nga nahimutang sa Mango Avenue, Barangay Camputhaw ning Dakbayan sa Sugbo, Sabado sa gabii atol sa hiniusang operasyon sa mga otoridad.

Ang nasikop naila nga si Jefferson Taplada, 44anyos, biyudo, taga Barangay A.lopez; Ricardo Deligero, 30, taga Barangay Punta Princesa nga sakop sa usa ka anti-crime volunteer group base sa nakuha kaniya nga identification card ug ingon man ang usa ka minor de edad.

Alas -11 pasado sa gabiinipahigayon og hiniusa nga anti-human trafficking operations ang IDMB, WCPD, RACU7 ug DSWD sa maong dapit nga niresulta sa pagkasikop sa tulo ka giingong bugaw ug pag rescue sa 11 ka mga minor ug 17 ka mga hamtong nga mga babaye ug mga bayot.

Nasakmit gikan sa mga dinakpan ang marked money nga moabot P7 mil, aluminum tinfoils, duha ka motor, klase-klase nga cellphones ug identification cards. Matud pa Police Lieutenant Erlinda Mayam, pangulo sa WCPD sa Cebu City Police Office dul-an sa tulo ka semana nila nga gipanid-an hangtud nga natumbok nila kun kinsa ang mga nalambigit sa human trafficking sa maong lugar.

Dugang pa ni Mayam, ang tulo ka mga bugaw giingong maoy tighatud sa mga babaye ngadto sa mga lalaking gusto og makadiyot nga kalipay sa unod. Matud pa dili lang lokal kay duna say mga langyaw nga mokuha og mga babaye.

Si Mayam, nitug-an ang mga na rescue asikasohon usa kini diha sa DSWD samtang giandam ang ipasakang kaso nga kalapasan sa RA 9208 o Expanded Anti-Trafficking in Persons Ra 10364 ug Section 12 Article 2 sa RA 9165 Comprehensive Drugs Act.

Apan ang dinakpan nga si Deligero hugtanon nga nihimakak sa pasangil batuk kaniya. Sumala pa niya wala siya makahibalo sa mga transaksyon kay igo ra siya nagmaneho sa habal-habal ug gisakyan ra siya og babayeng pasahero.

Matud niini igo ra siya gipadawat sa kwarta ug wala siya masayod nga marked money diay kadto. Giklaro niya nga dili siya bugaw.

Atol sa pag-check kang Deligero, nakuhaan kini og replica sa pistola, apan siya miingon nga gamit nila kini sa iyang pagpaniid isip sakop sa citizens police.

Samtang si Taplada nitug-an nga igo ra siya nitabang sa iyang mga amigo nga bugaw ug kaila ra usab niya ang mga babaye nga ilang gibugaw.

Mitug-an kini nga usahay makadawat siya og P200 gikan kanila apan iyang giklaro nga usa siya ka dance instructor ug mao kini iyang trabaho.

Ang manager sa maong  bar nga si Marlom Maglasang nakurat sa nahitabong operasyon ka nagtuo ra gyud siya nga pamilya lang ang kauban sa mga minor nga nisulod sa ilang establisamento kay Family KTV Bar man kini. Matud niya, tungod sa nahitabo pahugtan ug estriktuhon na nila ang pagpasulod og customer aron di na kini masubli pa.

Usa ka minor nga naluwas ang nitug-an wala siya magtuong maapil siya og kasikop kay dihang gitawgan siya giimbitar siya nga maglingaw-lingaw lang uban sa ilang barkada kay adunay bag-o nga niabot nga bisitang nag-birthday hinungdan nga sila nag-videoke ug nag-inom sa lugar. (/IBM)(BANATNEWS)