Tulo ka polis “tulog sa pansitan” sakpan

CEBU, Philippines — Tulo ka polis sa probinsya sa Sugbo relibohan human nasakpang natulog sa estasyonan matud pa ni Cebu Provincial Police Office nga si Police Colonel Roderick Mariano human nasakpan sa kinalit nga inspeksyon nga gihimo sa iyang Deputy Provincial Director for Administration sa mga estasyonan sa probinsya sa Sugbo niadtong Domingo sa kaadlawon.

Nasuta nga duha ka mga polis sa Catmon Police Station ug usa sa Sogod Police Station ang naabtang nangatulog sa ilang pwesto ug wala pa gyud magsuot og tarong sa ilang uniporme.

“They were found sleeping in their post, not in proper uniform, that’s why immediately by tomorrow we will relieve them dito sila magdu-duty,” sigun ni Mariano. Pasakaan og kasong administratiba ang tulo ug giingong hayan dili na sila makabalik sa ilang mga estasyonan. “’Pag walang supervision ito ang mangyayari sa kapolisan,” sigun sa maong direktor. Giingong karong adlawa paeksplikaron niya ang mga hepe sa maong mga polis. Kun adunay makitang pagkuwang ang maong mga hepe hayan apilon sila sa pasakaan og kasong administratiba ug relibohan sab sa pwesto.

Samtang nagdagan pa ang kasong administratiba sa maong  mga polis, giingong adto usa sila mo-duty sa Camp General Arcadio Maxilom. Dugang padayag sa maong direktor nga magpahigayon pa sila og mga kinalit nga inspeksyon sa mga estasyonan apan wala kini mibutyag kun diing estasyona sila sunod maginspeksyon. (BANAT NEWS)