Anak sa opisyal sa bohol sikop sa ‘party drugs’

CEBU, Philippines — Sikop sa buy-bust operation ang anak sa city administrator sa Tagbiliran City, Bohol sulod sa usa ka hotel sa siyudad niadtong Sabado sa gabii.

Giila ang dinakpan nga si Eric John Borja, 26, residente sa maong siyudad, ug job order employee sab sa Tagbilaran City Hall.

Hiniusang operasyon sa National Bureau of Investigation ug Philippine Drug Enforcement Agency sa Bohol ang nisikop ni Borja.

Sigun pa sa direktor sa NBI-Bohol, Atty. Renan Oliva, nga nakadawat sila og imporasyon kabahin sa presensya sa party drugs sa Isla sa Panglao ug sa dihang ilang gisubay nigawas ang pangalang “Eric” nga maoy tinubdan niini.

Wala sila magdahum nga anak diay kini sa city administrator sa Siyudad sa Tagbilaran nga si Leonedes “Edi” Borja.

Nipahigayon og duha ka buwang surveillance ang mga awtoridad usa pa nalusad ang buy-bust operation sanglit dili kini dali nga mosalig og mga buyer ilabi na kun lalaki ug tiguwang.

Atol sa buy-bust operation, batan-ong babaye ang ilang gigamit nga poseur buyer.

“Ingon siya, normally iyang selling price is P3k to P5k pero babaye man nga batan-on naay discount P1,500 na lang,” matud ni Oliva Giingong nangangkon ang suspek nga gikan ra sab sa Panglao ang iyang gipamaligyang ecstasy apan base sa pasiunang imbestigasyon sa mga awtoridad pinaagi sa mga mensahe sa cellphone niini nga gikan sa Dakbayan sa Sugbo ang supply.

Dugang ni Oliva nga modus sa suspek nga mo-check-in gyud sa mga hotel sa Tagbilaran ug adtoon ra siya sa mga mopalit.

Giingong molargahay na unta sa gawas sa nasud karong tuiga si Eric John aron magpakasal sa iyang long term girlfriend.

Walay piyansa ang kaso nga atubangan sa suspek sa kalapasan sa Republic Act 9165 o ang Comprehensive Dangerous Drugs Act of 2002.

Dugang ni Oliva nga daku ang iyang pagtuo nga walay kasayuran ang amahan sa suspek sa modus sa anak.

Samtang nasakmit ang mokabat sa P600,000 nga kantidad sa shabu gikan sa 15 ka pusher nga nasikop sa managlahing buy-bust operation sa Dakbayan sa Lapu-Lapu.

Ang operasyon gipahigayon sa Barangay Pajo, Basak, Pusok, Mactan, Punta Engaño, Gun-ob, Poblacion ug Marigondon.

Si Police Major Wayne Magbanua, hepe sa Presinto 3 sa Lapu-Lapu City Police Office, niila sa ilang nadakpan nga nakuhaan og 60 gramo nga shabu nga si Mervin John Mendez Madrid, 20, taga Sambag II, Dakbayan sa Sugbo.

Laing giila ni Magbanua nga nadakpan mao si Randy Angana dela Cruz, 38, taga Paknaan, Dakbayan sa Mandaue, nga nakuhaan og lima ka medium size nga pakete sa shabu nga nagkantidad og P170,000.

Nadakpan usab ang usa ka babaye nga si Annie Joy Manuales, 20, taga Ponce II, Ermita, Dakbayan sa Sugbo; Joemar Escaran, 30, taga Sitio Olidon, Day-as, Dakbayan sa Sugbo nga nakuhaan og P47,600 nga kantidad sa shabu.

Ang laing 12 pa nga nadakpan pulos taga Dakbayan sa Lapu-Lapu. (Romeo T. Limpangog/GMR)(BANATNEWS)