P3, 000 bonus sa taga kapitolyo
CEBU, Philippines – Makadawat gihapon og bonus ang mga empleyado sa Kapitolyo.
Kini sukwahi sa unang pamahayag ni Gobernador Gwendolyn Garcia nga dili siya mohatag og dagkung bonus sa mga kawani sa Probinsiya sa Sugbo ilabi na nga dagku na sab ang mga sweldo niini.
Base sa supplemental budget sa probinsiya nga giaprobahan niadtong Lunes, apil sa gigahinan mao ang anniversary bonus sa mga personnel nga moabot sa kapin P5 milyones.
Ang gobernador nagkanayon nga wala na siya mo-anunsiyo pa niini ug gusto na lang niya nga deretso nga ihatag ngadto sa mga empleyado sa Kapitolyo.
Si Emmie Gingoyon, ang provincial budget officer, nagkanayon nga matag empleyado makadawat kini og dili molapas sa P3,000 nga bonus diin lakip na niini ang mga regular ug casual nga mga kawani nga nagtrabaho sa Kapitolyo sulod na sa usa ka tuig hangtud sa Agosto 6, 2019 ug apil na niini ang mga piniling opisyal.
Niadtong 2018, niabot sa P15,000 ang anniversary bonus sa mga kawani sa Kapitolyo ubos sa administrasyon ni kanhi gobernador, karon Bise Gobernador Hilario Davide III. (/GMR)(BANAT NEWS)
- Latest