Bagong merkado sa Mandaue ablihan na

CEBU, Philippines — Gihangop sa liboan ka manindahay sa Dakbayan sa Mandaue ang gikatakda nga pagbukas sa bag-ong merkado publiko sa karaan nga nahimutangan niini luyo sa National Shrine of Saint Joseph sa Barangay Centro.

Kini gumikan kay mapahimutang na man ang ilang pagpaninda nga maisip na nga permanente ug sukwahi sa kasamtangan nilang nahimutangan nga temporaryo ug lisud ang kahimtang.

Ang 1,046 ka manindahay sa maong dakbayan nga maoy narehistro nga market vendors sa dakbayan ang mapahimutang na sa dili pa ang Agosto 30 nga maoy pagsaulog sa ika-50 ka tuig nga Charter Day sa dakbayan.

Si City Administrator, Atty. Jamaal Calipayan, niingon nga ang City Engineering Office ug ang project contractor sa gitukod nga merkado ang padayon na karon nga nag-andam alang sa hingpit na nga pagtugyan sa proyekto ngadto sa kagamhanan. “While we are doing that infrastructure-wise, we are also processing sa pag-raffle and pag-award sa atong mga stalls ug eventual nga pagbalhin sa mga vendors sa new market,” matud ni Calipayan.

Dugang pa niya nga kasamtangan na karon nga gitan-aw sa market committee ang bayranan sa mga vendors sa matag stall aron mabuhatan og ordinansa sa konseho.

Ang duha ka andana nga edipisyo gipatukod ni Mayor Jonas Cortes sa niagi niyang termino sa kantidad nga P385 milyones nga adunay 1,119 ka stalls.

Ang manindahay sa dakbayan mao kadtong mga vendors nga kasamtangan nga nag-abang sa daan nga merkado sa luyo nga bahin sa Mandaue City Cultural and Sports Complex. (/GMR)(BANATNEWS)