Kapin P2M shabu nasakmit

CEBU, Philippines – Mokabat P2 milyones kapin nga balor sa illegal nga drugas ang nasakmit sa kapulisan sa Dakbayan sa Sugbo nga niresulta sab sa pagkasikop sa upat ka tawo sa managlahi nga operasyon adlaw nga Miyerkules.

Alas-8 sa gabii nasikop diha sa Bliss, Barangay Labangon ang High Value Targets nga sila si Lilibeth Navales, 40; Lovelyn Joy Gomotong, 18; tinun-an sa senior high ug puros residente sa A. Lopez, Street, Barangay Labangon ug Joemarie Suson, 22, taga Pagadian City.

Nangulo sa maong operasyon si Police Major Henrix Bancoleta, hepe sa Police Station 10 ug nasakmit ang mga pinutos sa gituohang ginadili nga drugas nga motimbang ug 103 gramos nga mobalor og P705 mil, sudlanan sa drugas, buy bust money, cellphone ug usa ka multicab.Sunod nadakpan diha sa may Barangay Ermita si Rolly Juros alyas Esma, 21,  residente sa maong lugar.

Nangulo sa maong operation mao si Police Captain Alvin Arsula Llamedo, hepe sa Carbon Police Station. Nakuha gikan kang Juros, ang duha ka dagko nga putos sa gituohang ginadili nga drugas nga motimbang og 200 gramos nga mobalor og P1.3 milyon base sa Dangerous Drug Board Value, buy bust money, disposable lighter, plastic bag ug usa ka cellphone.

Samtang sa Dakbayan sa Talisay,  usa ka babaye usab nga High Value Target (HVT) ang nasikop atol sa buy bust operation sa Magay St., San Jose Village, Barangay Lawaan 3, Dakbayan sa Talisay. Ang dinakpan amo si April Villarias, 34, giingong napalitan kini og 50 gramos nga “shabu” gibana-banang nagkantidad og P340 mil. (Gabriel Bonjoc, Jenny Luz R. Tejas ug Noreen Rose C. Vilchez/IBM)(BANAT NEWS)