“Bigtime” pusher sud sa MCJ gipatay

CEBU, Philippines — Piniriso sa Mandaue City Jail kinsang adunay kaso sa illegal nga drugas ang kalit nga gidunggab hangtud nga namatay tungatunga sa pagduwa niini og basketball kauban sa ubang mga bilanggo kagahapon sa buntag.

Base sa inisyal nga report, alas 10:42 sa buntag naalarma ang mga nagbantay sa Mandaue City Jail Male Dormitory human nagkaguliyang ang mga piniriso sa rooftop diin nahimutang ang ilang basketball court.

Sa pagabot sa mga jailguards, napalgan na lang nga nabulit sa dugo ang pinirisong si Romy Ramas.

Matud pa sa assistant warden sa Mandaue City Jail-Mail dormitory nga si Senior Inspector Mark Tuñacao, buhi pa dihang ilang gikuha si Ramas apan nakabsan gyud kini sa kinabuhi pagabot sa tambalanan.

Si Tuñacao nagkanayon nga wala pa silay natumbok nga responsable sa maong krimen sanglit gawas nga walay motug-an wala say Closed Circuit Television (CCTV) ang basketball court.

 Matud niya nga sukad napriso si Ramas wala kini  sukad nakakita og kaaway sa sulod.

 “Regular inmate ra ni siya, dili maldito, dili badlongon. Magpatabang mi sa PNP sa pag-investigate ani aron sad nga walay bias ang investigation,” si Tuñacao midugang.

Samtang ang direktor sa Mandaue City Police Office nga si Police Colonel Jonathan Abella nagkanayon nga mohimo sila og buwag nga imbestigasyon sa kaso.

Gi-awhag niya ang Bureau of Jail Management and Penology nga ipa-autopsy ang patayng lawas ni Ramas aron matino gyud kun unsa ang hinungdan sa kamatayon niini.

 Matud ni Abella nga base sa  ilang rekord, si Ramas usa ka small time drug pusher ug nadakpan kini sa buy bust operation niadtong 2017 apan base sa ilang nakuhang impormasyon midako ang koneksyon.

Giingong nidaghan sab ang mga kliyente bisan naa sa prisohan isip middle man sanglit aduna kini contact sa tinubdan sa shabu didto sa kaulohan.

“Accordingly nahimo siyang big time nga pusher sa sulod, pero ato sa nang I confirm,” sigun niini.

Apan matud sa maong direktor nga dili pa kini nila makonsiderar nga posibleng anggulo sa krimen.

Tungod sa maong hitabo, gikanselar una ang mga dalaw sa maong prisohan. (BANAT NEWS)