Nasunogan sa Tipolo gidid-an pagpaduol sa CICC

CEBU, Philippines — Gipahimangnuan sa City Disaster Risk Reduction and Management Office (CDRRMO) sa Dakbayan sa Mandaue ang mga biktima sa sunog sa Brgy. Tipolo nga likayan ang pagpaduol sa Cebu International Convention Center (CICC) kay kuyaw nga matagakan sa mga tipaka gikan sa ibabaw nga bahin niini.

Si Felix  Suico, pangulo sa CDRRMO miingon nga ang pipila sa mga nasunogan, nipahimutang unta sa ilang mga payag-payag nga temporaryo nilang kapuy-an apan dali kini nilang gibalhin ngadto sa laing lugar sa paglikay sa aksidente.

Matud pa ni Suico nga molanat pa og pipila ka mga semana ang pagpatukod og balik sa ilang mga balay ngadto sa luna nga ilang giukopar kay gihimo pa man sa lokal nga kagamhanan ang pagpaabuno sa mga lupa nga bahin sa lugar.

Human sa maong pag-abuno, himuon ang reblocking sa dapit diin adunay ipahimutang nga mga dalan nga kaagian og mga sakyanan isip pangandam sa posibleng mahitabo nga emerhensiya sa lugar.

Si Suico miingon nga   gihatagan  na usab og hingpit  nga kasulbaran ang suliran sa mga biktima sa sunog sa Brgy. Guizo kay daghan na kanila ang misanong sa pagbalhin sa laing lugar ngadto sa duha ka ektaryang luna sa Brgy. Casili sa Lungsod sa Consolacion nga maoy nagsilbing relocation site nga gipalit sa kagamhanan. (DILT) (BANAT NEWS)