Duha gipatay sa Talisay

CEBU, Philippines — Duha ka tawo ang gipamusil patay sa managlahing barangay sa Dakbayan sa Talisay niadtong Biyernes. Usa kanila giingong fixer kinsa gipatay diha sa Sitio Salvador, Barangay Tanke.

Ang biktima nailhan nga si Julius Engbino, 43, taga Ward 3, Barangay Poblacion, lungsod sa Minglanilla. Base sa inisyal nga imbestigasyon sa kapulisan nasuta aduna’y tulo ka tawo nga nangita sa biktima hangtud nga siya natultolan.

Ang biktima nakaangkon og samad pinusilan sa iyang ulo nga maoy hinungdan sa hinanaling kamatayon.

Si Police Major Orlando Carag Jr. hepe sa kapulisan sa siyudad nibutyag nga gitan-aw nila nga may kalambigitan sa pagka fixer sa biktima ang kamatayon niini tungod matud pa nabulilyaso ang uban niining gilihok.

Apil sa gisusi ang ilegal nga drugas kay giingong magsige kini’g balik-balik sa Barangay Tanke nga naila nga daghang drugas nga baligya.

Sa laing pagpamusil, nahitabo kini sa usa ka apartment sa Barangay Cansojong, Dakbayan sa Talisay niadtong Biyernes sa gabii diin gipusil si Jeber Jerusalem, 34, taga Barangay Lawaan 3 sa maong siyudad sa tawong gikalalis niini.

Gisuwayan pa sa mga sakop sa Talisay Rescue Emergency Action Team (TREAT) sa pagtabang ang biktima apan nakabsan na gyud kini sa kinabuhi.

Base sa CCTV footage, adunay duha ka wa mailhing lalaki ang nakitang nagsige’g saka-kanaog sa pikas nga apartment hangtud nga nakita nga naglalis na sila sa biktima ug gipusil kini.

Ang kuyog sa biktima nga usa ka babaye gisuwayan sab og pusil apan wala kini maigo. Nisibat ang mga gunmen sakay og motorsiklo samtang ang babaye nga kauban sa biktima nagdali-dali sab og sibat sa ilang giabangan nga apartment.

Si Police Major Orlando Carag Jr., hepe sa kapulisan sa maong siyudad miingon nga sukad nga niabang sa maong apartment ang biktima daghan nang mga tawo ang magsige sulod-ug gawas sa lawak niini, ang uban nila naa sa  drug watchlist sa kapolisan. (/IBM)(BANATNEWS)